ඉරානය සහ ඇමෙරිකාව අතර පවතින බිඳෙනසුලු සටන් විරාමය හමුවේ, ඇමෙරිකා එක්සත් ජනපදය යළිත් වරක් හමුදාමය ක්රියාමාර්ගයකට යොමු වුවහොත් ඔවුන්ට පෙර නොවූ විරූ දැවැන්ත පරාජයකට මුහුණ දීමට සිදුවනු ඇති බවට ඉරානයේ 'ප්රෙස් ටීවී' පුවත් සේවය විශ්ලේෂණාත්මක වාර්තාවක් ඉදිරිපත් කරමින් අනතුරු අඟවයි.
පසුගිය දින 40 පුරා පැවති නීතිවිරෝධී යුද්ධයේදී ඇමෙරිකානු යුද සැලසුම්කරුවන් විසින් නොසලකා හරින ලද තීරණාත්මක සාධක කිහිපයක් ඉරානය සතු බවත්, එම සාධක ක්රියාත්මක වුවහොත් ඇමෙරිකාව බරපතල අර්බුදයකට ඇද වැටෙනු ඇති බවත් එම වාර්තාව පෙන්වා දෙයි.
ඇමෙරිකාව විසින් සිදුකරනු ලබන මුහුදු කොල්ලකෑම්වලට එරෙහිව ඉරානය මෙතෙක් ප්රකාශයට පත් නොකළ 'අසමමිතික' ප්රතිචාර දැක්වීමේ ක්රමවේදයක් සතුය. එහි ස්වභාවය, කාලය සහ ක්රියාත්මක කරන ආකාරය රහසිගතව තබා ගැනීම හරහා සතුරා දැඩි ව්යාකූලත්වයකට පත් කිරීමට ඉරානය සමත්ව ඇත.
ඉරානය සහ කලාපීය ප්රතිරෝධී බලවේග සතු භයානක විකල්ප රැසක් මෙතෙක් යුධ පිටියේදී භාවිත කර නොමැත. හෝමුස් සමුද්ර සන්ධිය යටින් දිවෙන ෆයිබර් ඔප්ටික් සන්නිවේදන පද්ධති වැනි සංවේදී මර්මස්ථාන පිළිබඳව ඇමෙරිකාව දැනටමත් පසුවන්නේ දැඩි බියකින් බව එම වාර්තාවේ සඳහන් වේ.
හෝමුස් සමුද්ර සන්ධිය වසා දැමීම හේතුවෙන් ගෝලීය ආර්ථිකය මෙන්ම ඇමෙරිකානු ආර්ථිකයද දැඩි අර්බුදයකට ලක්ව තිබේ. නාවික අවහිරතා පවතින පසුබිමක වුවද, අසල්වැසි රටවල් කිහිපයක් සමඟ විහිදී යන කිලෝමීටර් 8,000ක ගොඩබිම් සීමාව භාවිත කරමින් තම සැපයුම් පවත්වා ගැනීමට ඉරානයට හැකියාව ඇත.
පවතින ආර්ථික පීඩනය හමුවේ ඉරානය තුළ රජයට එරෙහි කැරලි ඇති කිරීමට ඇමෙරිකාව දරන උත්සාහය ජාතික සමගිය හමුවේ අසාර්ථක වී ඇති බව ප්රෙස් ටීවී පවසයි. පසුගිය ජනවාරි මාසයේදී ඉරාන රජය පෙරළා දැමීම සඳහා ත්රස්තවාදී කණ්ඩායම්වලට තමන් මුදල් සහ අවි ලබාදුන් බවට ජනාධිපති ට්රම්ප් කළ පාපොච්චාරණයත් සමඟ ඉරාන වැසියන් අතර ඇමෙරිකානු විරෝධය තවදුරටත් දැඩි වී තිබේ.
පසුගිය කෙටි යුධ සමයේදී ඉරාන වැසියන් 3,000කට අධික පිරිසක් ජීවිතක්ෂයට පත්වීම හේතුවෙන්, ජනතාව තුළ පවතින වෛරය සහ දේශප්රේමීත්වය හමුවේ ඇමෙරිකානු උපක්රම තවදුරටත් වලංගු නොවන බව එම වාර්තාව අවධාරණය කරයි. ඒ අනුව, මීළඟට යුද්ධය හෝ ඉරානයේ කොන්දේසි පිළිගැනීම යන තේරීම් දෙකෙන් එකක් තෝරා ගැනීමට ඇමෙරිකාවට සිදුවනු ඇතැයි එම විශ්ලේෂණය නිගමනය කරයි.
