විවිධ රාජ්‍ය ආයතනවලට අයත් වාහන 73ක් යුද හමුදාව විසින් නිල වශයෙන් භාර නොගෙන භාවිත කර ඇති බව නවතම විගණන වාර්තාවක් මඟින් අනාවරණය කර තිබේ.
මෙම වාහන අතරට ට්‍රැක්ටර්, ට්‍රේලර්, ගිලන් රථ, කැබ් රථ, ජීප්, ඉන්ධන බවුසර්, බස් රථ සහ යතුරුපැදි අයත් වේ.
විගණනයේදී සටහන් කර ඇත්තේ, මෙම වාහනවලින් 24ක් 2014 වසරේ සිට අදාළ විගණන වසර දක්වා ධාවනය කළ නොහැකි තත්ත්වයේ පැවති බවත්, ඒවා හමුදා පරිශ්‍රයන් තුළ නවතා තිබූ බවත්ය.
ඊට ප්‍රතිචාර ලෙස ගිණුම්කරණ නිලධාරීවරයා ප්‍රකාශ කර ඇත්තේ, අදාළ ආයතනවලින් අවශ්‍ය ලේඛන රැස්කිරීමට මේ වන විටත් පියවර ගනිමින් සිටින බවත්, ඉන් පසු වාහන නිල වශයෙන් භාරගැනීම සම්පූර්ණ කරන බවත්ය.
සමුචිත වගවීම සහ කළමනාකරණය සහතික කිරීම සඳහා, මෙම වාහන නිල වශයෙන් භාරගන්නා ලෙස හෝ අදාළ ආයතන වෙත ආපසු භාරදෙන ලෙස විගණනය මඟින් යුද හමුදාවට නිර්දේශ කර තිබේ.
මේ අතර, විගණන වාර්තාව මඟින් තවත් වැදගත් කරුණක් අනාවරණය කර ඇත. යුද සමයේදී යුද හමුදාවට අත්පත් කරගත් වාහන 547ක් අතුරින්, වාහන 454ක රක්ෂණ ආවරණයක් නොමැති බව හෙළි වී තිබේ.
තවද, මෙම වාහනවලින් 221ක් 2024 වසරේ කිසිදු කටයුත්තක් සඳහා භාවිත කර නොමැති අතර ඒවා හමුදා පරිශ්‍රයන් තුළ නවතා තිබී ඇත.
ඉතිරි වාහන සඳහා රක්ෂණ ආවරණ ලබාගැනීමට පියවර ගනිමින් සිටින බව ගිණුම්කරණ නිලධාරීවරයා දැනුම් දී ඇත.
සියලුම ධාවනය වන වාහන නිසි පරිදි රක්ෂණය කර ඇති බව තහවුරු කිරීමටත්, දැනට රක්ෂණ ආවරණයක් නොමැති වාහන සඳහා අවශ්‍ය ක්‍රියාමාර්ග ගැනීමටත් කඩිනම් පියවර ගන්නා ලෙස විගණනය මඟින් යුද හමුදාවට අවධාරණය කර ඇත.
