ආරක්ෂක අමාත්‍යාංශය යටතේ ඇති ජාතික ආපදා සහන සේවා මධ්‍යස්ථානය (NDRSC) විසින් අමාත්‍යාංශ ලේකම්වරු, දිස්ත්‍රික් ලේකම්වරු ඇතුළු ප්‍රධානීන් වෙත යොමු කරන ලද නව ලිපියක් මඟින් හදිසි ආපදා තත්ත්වයකදී සහන සැලසීම පිළිබඳ සංශෝධන සහ පැහැදිලි කිරීම් නිකුත් කර තිබේ
ආපදා සහන සේවා චක්‍රලේඛ හා මාර්ගෝපදේශ 01/2025 ට අදාළව, ශ්‍රී ලංකා ප්‍රාදේශීය ලේකම්වරුන්ගේ හා සහකාර ප්‍රාදේශීය ලේකම්වරුන්ගේ සංගමයේ යෝජනා සැලකිල්ලට ගනිමින් මෙම පියවර ගෙන ඇත.
ආපදා තත්ත්වයෙන් පීඩාවට පත්වන සියලුම ජනතාවට පිසූ ආහාර ලබාදීමට කටයුතු කළ යුතු බවට ආරක්ෂක අමාත්‍යාංශය අවධාරණය කරයි.
ආපදා සහන සේවා චක්‍රලේඛ හා මාර්ගෝපදේශ 01/2025 හි, සුරක්ෂිත මධ්‍යස්ථාන වලට පැමිණෙන අයට පමණක් පිසූ ආහාර ලබාදිය යුතු බවට සඳහන් නොවන බව පැහැදිලි කර තිබේ.
2025.11.21 වන දින සිට බලපෑ ආපදා තත්ත්වය විස්තීර්ණ ආපදා තත්ත්වයක් බවට ප්‍රකාශයට පත්කර ඇති බැවින්, සහන සැලසීම සඳහා කඩිනම් පියවර ගෙන තිබේ.
විස්තීර්ණ ආපදාවක් ප්‍රකාශයට පත් කර ඇති මෙවැනි අවස්ථාවකදී පිසූ ආහාර හා වියළි සලාක ලබාදිය හැකි බව සඳහන්ය.
වියළි ආහාර ද්‍රව්‍ය සඳහා මුදල් බැංකු ගිණුම් ගත කිරීම වෙනුවට, ආපදාවට ලක් වූ පුද්ගලයන්ට ගැලපෙන පරිදි වියළි ආහාර ද්‍රව්‍ය වුව ද ලබාදිය හැකි බව දන්වා ඇත.
මුදල් අමාත්‍යාංශ ලේකම්ගේ ලිපියක් මඟින් රුපියල් මිලියන 50ක් දක්වා බාධාවකින් තොරව ප්‍රසම්පාදන කටයුතු සිදුකිරීමට ප්‍රාදේශීය ලේකම්වරුන් වෙත බලය ලබා දී තිබේ.
කඩිනම් සහන යටතේ වියළි ආහාර ද්‍රව්‍ය වෙනුවෙන් ලබාදෙනු ලබන දීමනාව පහත පරිදි සංශෝධනය කර ඇත (සතියක් සඳහා උපරිමය - දිනකට උපරිමය මෙම මුදලින් 1/7ක් විය යුතුය)
| සහනාධාර වර්ගය | ගෙවිය යුතු ප්‍රමාණය (රු.) |
| තනි පුද්ගලයෙකු සඳහා | 2,100.00 |
| සාමාජිකයින් 02න් යුත් පවුලකට | 4,200.00 |
| සාමාජිකයින් 03න් යුත් පවුලකට | 6,300.00 |
| සාමාජිකයින් 04න් යුත් පවුලකට | 8,400.00 |
| සාමාජිකයින් 05ක් හෝ ඊට වැඩි පවුලකට | 10,500.00 |
