මොඩියුලවල පිටු ලක්‍ෂ අටක් ගලවන්න වෙලා..

 

නව අධ්‍යාපන ප්‍රතිසංස්කරණ යටතේ මොඩියුල වල දෝෂ රැසක් ඇති බවත් ඒ අනුව පිටු ලක්ෂ අටක් ගැලවීමට සිදුවනු ඇති බවත් විදුහල්පති ශ්‍රේණි නිලධාරීන්ගේ සංගමය සඳහන් කරයි.

එහි ලේකම් නිමල් මුදුන්කොටුව මහතා කියා සිටියේ මෙම මොඩියුල රචනා කිරීමට තෝරාගෙන ඇති කණ්ඩායම සුදුසුම කණ්ඩායමක් යන්න ‍ප්‍රධාන ගැටලුවක් බවයි.

නව අධ්‍යයන වර්ෂය වෙනුවෙන් අද දින පාසල් විවෘත වුවද, 6 ශ්‍රේණියට ඇතුළත් වන සිසුන්ගේ අධ්‍යාපන කටයුතු මෙහෙයවීම සම්බන්ධයෙන් බලධාරීන් නිසි වැඩපිළිවෙළක් සකස් කර නැතැයිද පවසන මුදුන්කොටුව මහතා පෙන්වා දෙන්නේ, රජයේ සැලසුමට අනුව 6 ශ්‍රේණියේ නිල ඉගැන්වීම් ආරම්භ වීමට නියමිතව ඇත්තේ මෙම මස 21 වැනිදා බවයි.

එම ප්‍රමාදය හේතුවෙන් අද දින පාසල් පැමිණි දරුවන්ට එදින දක්වා ඉගැන්විය යුතු දේ පිළිබඳව ගුරුවරුන් සහ විදුහල්පතිවරුන් දැඩි ව්‍යාකූලත්වයකට පත්ව සිටින බවය. 

මීට අමතරව, පාසල් ආරම්භයේදී අත්‍යවශ්‍ය වන ශිෂ්‍ය නාමලේඛන ඇතුළු ලේඛන මෙතෙක් පාසල් වෙත ලබා දී නොමැති බවත්, ඉතිහාසයේ මෙවැනි පසුබෑමක් වාර්තා වූ ප්‍රථම අවස්ථාව මෙය බවත් ඔහු අවධාරණය කළේය.

''ප්‍රශ්නගත මොඩියුලර් සම්බන්ධයෙන් රජය අරගෙන තියෙන විසඳුම තමයි පිටු ගලවන එක. දැන් මේ වෙනකොට සමාජ මාධ්‍ය ජාලාවල සාමාන්‍ය පුරවැසියෝ මේ මොඩියුල් නිරීක්ෂණය කරලා, ඒවායේ තියෙන අඩුපාඩු තොග පිටින් ලියමින් ඉන්නවා. 

දැන් ඇතැම් තැන්වල ව්‍යාකරණ වැරදි එක ම මොඩියුලයක් ඇතුළේ විශාල ප්‍රමාණයක්, සිය ගණනක් සටහන් කරලා තියෙනවා අපි දැක්කා. එතකොට අපි අහනවා, දැන් මේ වාගේ තවත් මේ මොඩියුල් සම්බන්ධව ප්‍රශ්න ආවොත් ඒ පිටුත් ගලවනවා ද ප්‍රශ්නගත පිටුව ගලවනවා නම් ඊළඟට ප්‍රශ්නයක් ආවහම ඒකටත් තියෙන ආණ්ඩුවට විසඳුම පිටු ගලවන එකනේ. 

එතකොට දැන් ප්‍රශ්නගත විතරක් පිටු ලක්ෂ අටක් ගලවන්න තියෙනවා. ඒක කවුරු කරනවද? කොහොම කරනවද? කියලා අපි දන්නෑ. එතකොට එක පැත්තකින් පිටු ගලවලා වැඩකුත් නෑ. මොකද මේකේ පී. ඩී. එෆ්. එක එළියේ තියෙනවා. එතකොට දැනගන්න ඕන හැමෝම දැන් මේවා දැනගෙන ඉවරයි. පිටු ගැලෙව්වා කියලා කිසිම දෙයක් වෙන්නේ නෑ. කිසිම තේරුමක් නෑ. ඊළඟට තවදුරටත් මොඩියුල්වල ප්‍රශ්න සහගත දේවල් තිබුණොත් ඒවායෙත් පිටු ගලවන එකද ආණ්ඩුවේ විසඳුම කියලා අපි දැනගන්න කැමතියි.''