බටහිර රටවල් විසින් පනවා ඇති සම්බාධක හේතුවෙන් ශ්රී ලංකාව තුළ වෙසෙන සහ මෙහි පැමිණෙන රුසියානු පුරවැසියන් දැඩි අපහසුතාවයට පත්ව ඇති බවත්, මෙය රුසියානු ජනතාවට එරෙහිව පනවා ඇති ‘සමූහ දඬුවමක්’ බවත් ශ්රී ලංකාවේ රුසියානු තානාපති ලෙවන් ජගර්යන් මහතා ප්රකාශ කළේය,.
කොළඹදී පැවැති විශේෂ මාධ්ය හමුවකදී තානාපතිවරයා අවධාරණය කළේ, රුසියානු ආයෝජන ශ්රී ලංකාවට ගලා ඒමට දැඩි උනන්දුවක් පැවතියද, බටහිර සම්බාධක හේතුවෙන් එම ආයෝජන අවස්ථාවන් ඇනහිට ඇති බවයි.
විශේෂයෙන්ම රුසියානු පුරවැසියන්ට මෙරටදී තම බැංකු කාඩ්පත් (Visa/Mastercard) භාවිතා කිරීමට නොහැකි වී ඇති අතර, ඒ හේතුවෙන් ඔවුන්ට මුදල් සන්තකයේ තබා ගැනීමට හෝ තෙවන පාර්ශවීය ගෙවීම් ක්රම මත යැපීමට සිදුව ඇත.
තම පුද්ගලික විසා කාඩ්පත පවා අවහිර වී ඇති බව පෙන්වා දුන් තානාපතිවරයා, රුසියානු සංචාරකයින් මෙම බාධක ජය ගැනීම සඳහා චීන කාඩ්පත් හෝ වෙනත් ස්වාධීන රාජ්යයන්ගේ පොදුරාජ්ය මණ්ඩලීය (CIS) රටවල කාඩ්පත් භාවිතා කරන බව සඳහන් කළේය.
ශ්රී ලංකාව තුළ රුසියානු භාෂා අධ්යාපනය ප්රචලිත කිරීමට පියවර ගනිමින් සිටින බවත්, යාපනය සහ ත්රිකුණාමලය වැනි ප්රදේශවල රුසියානු භාෂා පාඨමාලා ආරම්භ කිරීම පිළිබඳව අවධානය යොමු කර ඇති බවත් ජගර්යන් මහතා වැඩිදුරටත් ප්රකාශ කළේය.
