කියුබාවේ සම්පූර්ණයෙන්ම විදුලිය බිදවැටිලා.. අපි කියුබාව අත්පත් කරගන්නවා..- ට‍්‍රම්ප්

අමෙරිකාව විසින් පනවන ලද දැඩි තෙල් අවහිරය හේතුවෙන් කියුබාව පුරා පවතින සම්පූර්ණ විදුලි බිඳවැටීමක් මධ්‍යයේ, එම රට අත්පත් කරගැනීමේ "ගෞරවය" තමන්ට හිමිවන බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇත. 

ධවල මන්දිරයේදී මාධ්‍යවේදීන් අමතමින් ඔහු කියා සිටියේ කියුබාවේ අනාගතය සම්බන්ධයෙන් වන සාකච්ඡා මධ්‍යයේ තමන්ට "අවශ්‍ය ඕනෑම දෙයක්" කිරීමේ බලය පවතින බවයි.

තමන් මුළු ජීවිත කාලය පුරාම කියුබාව සහ අමෙරිකාව අතර සබඳතාව ගැන අසා ඇති බවත්, අවසානයේ එය අත්පත් කරගැනීමේ අවස්ථාව තමන්ට හිමිවනු ඇති බවත් ට්‍රම්ප් විශ්වාසය පළ කළේය. 

"මම එය නිදහස් කළත්, අත්පත් කරගත්තත් - මට ඒ ඕනෑම දෙයක් කළ හැකියි කියා මම සිතනවා. ඇත්ත දැනගන්න ඕන නම්, ඔවුන් දැනට ඉතා දුර්වල ජාතියක්" යැයි ජනාධිපතිවරයා වැඩිදුරටත් පැවසීය.

කියුබාවේ ප්‍රධානතම විදේශීය ආධාරකරු වූ වැනියුලානු ජනාධිපති නිකොලස් මදුරෝ පසුගිය ජනවාරි මාසයේදී අත්අඩංගුවට ගැනීමෙන් පසු අමෙරිකාව කියුබාවට එල්ල කරන පීඩනය දැඩි කර ඇත. 

වැනියුලාවෙන් කියුබාවට ලැබෙන තෙල් නැව්ගත කිරීම් නතර කිරීමට පියවර ගත් ට්‍රම්ප්, කියුබාවට තෙල් විකුණන ඕනෑම රටකට බදු පනවන බවට තර්ජනය කර තිබේ. 

මෙම තත්ත්වය හමුවේ කියුබාවේ යල් පැන ගිය විදුලි පද්ධතිය සම්පූර්ණයෙන්ම අකර්මණ්‍ය වී ඇත.

නිල නොවන වාර්තා සඳහන් කරන්නේ පවතින සාකච්ඡා අතරතුර කියුබානු ජනාධිපති මිගෙල් ඩයස්-කැනෙල් (Miguel Díaz-Canel) පාලනයෙන් ඉවත් කරන ලෙස අමෙරිකානු නිලධාරීන් ඉල්ලීම් කර ඇති බවයි. 

අමෙරිකානු රාජ්‍ය ලේකම් මාර්කෝ රුබියෝ ද කියුබාවේ පාලන තන්ත්‍රය වෙනස් විය යුතු බවට දිගු කලක සිට අදහස් දක්වා ඇත. මීට පෙර ට්‍රම්ප් මෙය "මිත්‍රශීලී අත්පත් කරගැනීමක්" වනු ඇතැයි පැවසුවද, මෑතකදී ඔහු කියා සිටියේ එය මිත්‍රශීලී එකක් නොවීමට ඉඩ ඇති බවයි.

කෙසේ වෙතත්, කියුබාව සම්ප්‍රදායිකව තම අභ්‍යන්තර කටයුතුවලට අතපෙවීම් ප්‍රතික්ෂේප කර ඇත.ජනාධිපති ඩයස්-කැනෙල් ප්‍රකාශ කර ඇත්තේ අමෙරිකාව සමඟ සාකච්ඡා සිදුවිය යුත්තේ දෙරටේ දේශපාලන ක්‍රමවලට ගරු කරමින්, සමානත්වය සහ ස්වෛරීභාවය යන මූලධර්ම මත පදනම්ව බවයි