ගල්අඟුරු නැවු 16න් 14ක් බාලයි.. දිගටම නැවු එයි.. ටෙන්ඩරය අහෝසි නොකරයි..

වරුණි පෙරමුණ

ගල් අඟුරු ටෙන්ඩරය අහෝසි කිරීමට මෙතෙක් ආණ්ඩුව කටයුතු කර නොමැති බව සමගි ජන බලවේගයේ පාර්ලිමේන්තු මන්ත්‍රි එස්.එම් මරික්කාර් පවසයි.

සමගි ජන බලවේග ප්‍රධාන කාර්යාලයේ පැවැති මාධ්‍ය හමුවට එක්වෙමින් ඔහු සඳහන් කළේ ඩීසල් බලාගාරවලින් විදුලිය මිලදී ගනිමින් සිටියදීත් රට තුළට තවමත් ප්‍රමිතියෙන් තොර ගල් අඟුරු නැව් පැමිණෙන බවයි.

මේවනවිට රටට පැමිණ තිබෙන ගල් අඟුරු නැව් දහසයෙන් (16) ගල් අඟුරු නැව් දාහතරක් (14) ප්‍රමිතියෙන් තොර බවට වාර්තා වන තත්ත්වයක් තුළදී එමගින් විශාල මුදලක් පාඩුවන බව මහජන උපයෝගිතා කොමිසම පෙන්වා දී ඇතත් ආණ්ඩුව මෙම දුෂිත ගනුදෙනු සිදුකරන බව ඔහු කීය.

මෙවැනි දූෂිත ගනුදෙනුවලින් අවසානයේදි දුක් විඳින්නේ රටේ අහිංසක ජනතාව බවද ඔහු සඳහන් කළේය.

මෙම මාධ්‍ය හමුවේදී ඔහු වැඩිදුරටත් මෙසේද අදහස් දැක්විය.

කෙසේ නමුත් ආණ්ඩුව සිදුකරන හොරකම් වහගැනීමට, වංචා වහගැනීමට, දූෂණය වහ ගැනීමට, නොහැකියාව වසාගැනීමට එක බොරුවක් වහගන්න ආණ්ඩුව තවත් බොරු රැසක් සමාජ ගත කරන්න උත්සහ දරන බවක් පෙනෙන්න තිබෙනවා. ආණ්ඩුවේ වංචා, හොරකම්, වසා ගැනීමට බොරුව සමාජ ගත කිරීම හරහා රටක් දියුණු කිරීමට නොහැකියි. කෙසේ නමුත් ආණ්ඩුවේ බොරුව මහජනතාවට තේරුම් ගොස් තිබෙනවා. ආණ්ඩුව කෙරෙහි තිබුණ විශ්වාසය බිඳී ගියත් ජනතාවට ජනාධිපතිවරයා පිළිබඳව විශ්වාසයක් තිබුණා. අද වනවිට ජනාධිපතිවරයාත් බොරු කියන පුද්ගලයකු බවට පත්ව තිබෙනවා.