කළුගල් කතා බිදමින් හම්බන්තොට වරාය වාර්තාවක....

 හම්බන්තොට ජාත්‍යන්තර වරාය (HIP) සිය බහාලුම් මෙහෙයුම් ඉතිහාසයේ එක් නෞකාවකින් හැසිරවූ වැඩිම බහාලුම් පරිමාව වාර්තා කරමින් නව වාර්තාවක් පිහිටුවීමට සමත්ව තිබේ. 

මෙඩීටරේනියන් නැව් සමාගමට (MSC) අයත් 'MSC මාරි ලෙස්ලි' නෞකාව සාර්ථකව මෙහෙයවීමත් සමග වරාය මෙම ජයග්‍රහණය අත්කර ගත්තේය.

මෙම සුවිශේෂී සන්ධිස්ථානය හරහා කලාපීය බහාලුම් ප්‍රතිඅපනයන මධ්‍යස්ථානයක් ලෙස හම්බන්තොට වරාය සතු ශක්තිමත් භූමිකාව තවදුරටත් තහවුරු වී ඇත.

2026 අප්‍රේල් 11 වන දින සිට 15 වන දින දක්වා මෙහෙයවූ බහාලුම් සංඛ්‍යාව 7,968 කි. සමස්ත පරිමාව 13,260 කි.

මෙය මීට පෙර එම වරායේ වාර්තා පිහිටුවා තිබූ MSC ඉලෙනියා (TEU 12,957) සහ MSC රූබි (TEU 11,369) යන නෞකාවන්හි බහාලුම් පරිමාවන් අභිබවා යාමකි.

වරාය බලධාරීන් පෙන්වා දෙන්නේ කෙටි කලක් තුළ බහාලුම් මෙහෙයුම් මෙලෙස ශීඝ්‍රයෙන් වර්ධනය වීම හරහා HIP හි පවතින උසස් තාක්ෂණික කාර්යක්ෂමතාව මෙන්ම දැවැන්ත නෞකා හැසිරවීමට ඇති සූදානම මැනවින් පිළිබිඹු වන බවයි.