උගන්ඩාව වැනි රටවල සැගවූ ධනය සොයා පරීක්‍ෂණ කරමින් ඉන්නේ..- ටිල්වින්

 පසුගිය රජයන්හි නායකයන් විසින් විදේශ රටවල සඟවා ඇති බවට සැක කෙරෙන මුදල් පිළිබඳ විමර්ශන, අදාළ රටවල පූර්ණ සහයෝගය ඇතිව රජය විසින් මේ වන විටත් ආරම්භ කර ඇති බව ජාතික ජන බලවේගය අවධාරණය කළේය.

ප්‍රවෘත්ති සාකච්ඡාවකට එක්වෙමින් ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා ප්‍රකාශ කළේ, මෙම විමර්ශන අවසානයේදී එම මූල්‍ය වංචාවන්ට සම්බන්ධ පුද්ගලයන්, අදාළ මුදල් ප්‍රමාණයන් සහ එම මුදල් රඳවා ඇති රටවල් පිළිබඳ සියලු තොරතුරු හෙළිදරව් කිරීමට රජය අපේක්ෂා කරන බවයි.

පෙර කවරදාකටත් වඩා විදේශ රටවල් මෙම විමර්ශන සඳහා වත්මන් රජයට සක්‍රිය දායකත්වයක් ලබා දෙන බව ඔහු මෙහිදී පෙන්වා දුන්නේය.

"විදේශ රටවල් මෙම පරීක්ෂණ සඳහා රජයට විශාල සහයෝගයක් ලබා දෙනවා. මීට පෙර පැවති රජයන්ට මෙවැනි සහයෝගයක් ලැබුණේ නැහැ. එම ජාත්‍යන්තර සහයෝගය නිසාම විදේශයන්හි සැඟව සිටි පාතාල කල්ලි සාමාජිකයන් රැසක් මෙරටට ගෙන්වා ගැනීමට අපට හැකි වුණා," යැයි ලේකම්වරයා වැඩිදුරටත් පැවසීය.

උගන්ඩාව වැනි රටවල සඟවා ඇති බවට පැවසෙන මුදල් සහ එම විමර්ශනවල ප්‍රගතිය පිළිබඳව මාධ්‍යවේදීන් නැඟූ ප්‍රශ්නයකට පිළිතුරු දෙමින් ඔහු සඳහන් කළේ, පසුගිය පාලන සමයන්හි සිදු වූ මහා පරිමාණ දූෂණ හා වංචා පිළිබඳව පූර්ණ විමර්ශනයක් පවත්වන බවයි. 

විවිධ දූෂිත ක්‍රියාවන් හරහා උපයාගත් ධනය විවිධ රටවල තැන්පත් කර ඇති බවට විශ්වාස කරන බවත්, ඒ පිළිබඳ සත්‍ය තොරතුරු නුදුරේදීම ජනතාව හමුවේ තබන බවත් හෙතෙම අවධාරණය කළේය.