ඇමෙරිකානු ඩොලරයට සාපේක්ෂව දේශීය රුපියලේ අගය ශීඝ්රයෙන් අවප්රමාණය වීම හේතුවෙන් ඉදිරියේදී අත්යවශ්ය ද්රව්ය රැසක මිල ගණන් ඉහළ යාම වැළැක්විය නොහැකි බව අත්යවශ්ය ආහාර ද්රව්ය ආනයනකරුවන්ගේ සංගමය ප්රකාශ කරයි.
මාධ්ය වෙත අදහස් දැක්වූ එම සංගමයේ නිලධාරියෙකු අවධාරණය කළේ, වත්මන් තත්ත්වය හමුවේ ආනයන වියදම් ඉහළ යාම මීට ප්රධානතම හේතුව බවයි.
පවතින රුපියලේ බිඳවැටීමට වත්මන් රජය සෘජුව වගකිව යුතු නොවන බව පෙන්වා දෙන එම ප්රකාශකයා, මැදපෙරදිග කලාපයේ හටගෙන ඇති අර්බුදකාරී වාතාවරණය හේතුවෙන් ගෝලීය ආර්ථිකයන් රැසක් මේ වන විටත් දැඩි පසුබෑමකට ලක්ව ඇති බව සිහිපත් කරයි.
ලෝක වෙළෙඳපොළෙන් මෙරටට ගෙන්වනු ලබන කුඩාම භාණ්ඩයේ සිට සෑම දේකටම ඩොලර්වලින් ගෙවීම් කිරීමට සිදුව තිබේ.
මේ වන විට ඩොලරයක මිල රුපියල් 340 සීමාවට ආසන්න වී ඇති බැවින්, ජාත්යන්තර වෙළෙඳපොළේ ඇතැම් අත්යවශ්ය ද්රව්යවල මිල අඩු වුවද, එහි වාසිය දේශීය පාරිභෝගිකයා වෙත දීමට ආනයනකරුවන්ට හැකියාවක් නැත.උදාහරණයක් ලෙස, ලෝක වෙළෙඳපොළේ බී ලූනු මෙට්රික් ටොන් එකක මිල ඩොලර් 300 සිට ඩොලර් 250 දක්වා අඩු වී ඇතත්, රුපියලේ අගය පිරිහීම නිසා එම සහනය ජනතාවට ලබා දිය නොහැකි වී තිබේ. මෙවැනි තත්ත්වයකට මුහුණ දී ඇති තවත් ද්රව්ය රැසක් පවතින අතර, ඒවායේ මිල ගණන් ඉහළ නොදැමුවද අඩු කිරීමේ හැකියාවක් ද වර්තමානයේ නොමැත.
රුපියලේ අගය පහළ යාම සීනි ඇතුළු ද්රව්ය කිහිපයක මිල කෙරෙහි දැනටමත් බලපා ඇත. විශේෂයෙන්ම, ඉන්දියාව විසින් එළඹෙන සැප්තැම්බර් මස 30 වැනිදා දක්වා සීනි අපනයනය තහනම් කර තිබීම හේතුවෙන් මෙරට අවශ්යතා සපුරා ගැනීමට වෙනත් විකල්ප රටවල් සෙවීමට රජයට සිදුව තිබේ. කෙසේ වෙතත්, නව වෙළෙඳපොළවල් සොයාගන්නා තෙක් දේශීය පරිභෝජනය සඳහා ප්රමාණවත් සීනි තොග මෙරට සතුව පවතින බව ද එම සංගමය තහවුරු කරයි.
මේ අතර, රුපියල අවප්රමාණය වීම සහ ඉන්ධන මිල ඉහළ යාම හේතුවෙන් මෙරට ඉදිකිරීම් ක්ෂේත්රය ද බරපතළ කඩා වැටීමකට ලක්වෙමින් පවතින බව ශ්රී ලංකා ජාතික ඉදිකිරීම් සංගමය පවසයි. එහි ප්රකාශකයෙකු සඳහන් කළේ ගොඩනැගිලි ද්රව්ය වර්ග 300 කට ආසන්න ප්රමාණයක මිල ඉදිරියේදී සියයට 40 කින් පමණ ඉහළ යනු ඇතැයි අපේක්ෂා කරන බවයි.
සිමෙන්ති, වැලි, කොන්ක්රීට් කම්බි වැනි අමුද්රව්ය රැසක මිල මේ වන විටත් ඉහළ ගොස් ඇත. වත්මන් වෙළෙඳපොළේ කළුගල් මිල සියයට 60 කින් ද, කාපට් මිල සියයට 40 ත් 50 ත් අතර ප්රමාණයකින් ද ඉහළ ගොස් තිබේ. ටයිල් මිල මෙතෙක් වෙනස් වී නැතත්, නුදුරේදීම ඒවායේ මිල ද ඉහළ යනු ඇත.
පවතින ප්රසම්පාදන රෙගුලාසි අනුව මිල ඉහළ යන විට ඊට අදාළ අමතර ප්රතිපාදන ගෙවිය යුතු වුවද, එය වලංගු වන්නේ මාස තුනකට වඩා වැඩි කාලයක් තිස්සේ ක්රියාත්මක වන ව්යාපෘති සඳහා පමණි. රුපියල තවදුරටත් කඩා වැටුණහොත් දැනට ක්රියාත්මක රජයේ ඉදිකිරීම් සඳහා ගිවිසුම්ගත මුදලට වඩා සියයට 40 ත් 50 ත් අතර අමතර පිරිවැයක් දැරීමට රජයට සිදුවේ.
වත්මන් අර්බුදකාරී වාතාවරණය සැලකිල්ලට ගෙන, මාස තුනකට වඩා අඩු කෙටි කාලීන ව්යාපෘති සඳහා ද මෙම මිල ගැලපුම් සහනය ලබා දිය යුතු බව සංගමය පෙන්වා දෙයි. ඒ වෙනුවෙන් කැබිනට් පත්රිකාවක් සකස් කරමින් පවතින බවත්, ක්ෂේත්රය මුළුමනින්ම අඩපණ වීම වැළැක්වීම සඳහා මිල නිර්ණායකයන්ට අනුව වැඩි වන පිරිවැය කිසිදු ප්රමාදයකින් තොරව කොන්ත්රාත්කරුවන් වෙත ගෙවීමට පියවර ගන්නා ලෙසත් ඔවුහු රජයෙන් ඉල්ලා සිටිති.
රට අඳුරට
ReplyDelete