පැලවත්ත නොතකා අමුතු (ජාතික) ආණ්ඩුවක්.. ව්‍යාපාරිකයෙක් කපුකමේ.. රනිල්ගේ නිලධාරින්ටත් අත වනයි..

පවතින දැඩි ආර්ථික අර්බුදය හමුවේ විපක්ෂයේ දේශපාලන කණ්ඩායම් හා පුද්ගලයන් ද සම්බන්ධ කරගනිමින් ජාතික ආණ්ඩුවක් හෝ ඒ හා සමාන නව පාලන ව්‍යුහයක් කරා ගමන් කිරීමට ජනාධිපති අනුර කුමාර දිසානායක මහතා සූදානමක ඇති බවට දේශපාලන කරළියෙන් තොරතුරු වාර්තා වේ.

හිටපු පළාත් සභා මන්ත්‍රී වරුණ රාජපක්ෂ මහතා සඳහන් කරන්නේ, ජනාධිපතිවරයා මේ වන විට පැලවත්ත මූලස්ථානය කේන්ද්‍ර කරගත් වාමාසික දේශපාලන කණ්ඩායම් විසින් පනවා ඇති සීමාවන්ගෙන් මිදී නව ගමනක් යාමට තීරණය කර ඇති බවයි.

මෙම නව ගමන සඳහා සහාය ලබා ගැනීමට රනිල් වික්‍රමසිංහ මහතාගේ කාර්ය මණ්ඩලයේ සිටි නිලධාරීන්ට සහ සමගි ජන බලවේගයේ ක්‍රියාකාරීන්ට අමාත්‍ය විජිත හේරත් මහතා විසින් පවා දුරකතන ඇමතුම් ලබා දෙමින් සිටින බව ඔහු අනාවරණය කරයි.

පාර්ලිමේන්තු වෙනස්කම්වලට අමතරව, විවිධ රාජ්‍ය සංස්ථා සභාපතිකම් සහ වගකීම් සඳහා විපක්ෂයේ දක්ෂයන් එක් කර ගැනීමට මෙහිදී අවධානය යොමු වී ඇති බව ද පැවසේ.

මේ අතර, පාර්ලිමේන්තුවේදී අදහස් දැක්වූ සුජීව සේනසිංහ මහතා ද අවධාරණය කළේ, රජය මේ වන විට දැඩි අසීරුතාවකට පත්ව ඇති බැවින් තව මාස හතර පහක් ඇතුළත ජාතික ආණ්ඩුවක් පිහිටුවීමට එන්නැයි අනුර කුමාර දිසානායක මහතාට විපක්ෂයට ආරාධනා කිරීමට සිදුවන බවයි.

රජයේ නොහැකියාව හේතුවෙන් ආර්ථිකය විනාශ වෙමින් පවතින බවත්, ඉදිරි මාස පහ ඇතුළත ඩොලරයේ අගය රුපියල් 360 දක්වා ඉහළ යා හැකි බවත් ඔහු අනතුරු ඇඟවීය.

වරුණ රාජපක්ෂ මහතා පෙන්වා දෙන පරිදි, ජනාධිපතිවරයා මීට පෙර සජිත් ප්‍රේමදාස මහතා වැනි අයගේ සහාය ප්‍රතික්ෂේප කරමින් හිතුවක්කාර ගමනක් ගිය ද, දැන් එම මාවත වෙනස් කරමින් සිටියි.

මෙහි එක් පියවරක් ලෙස ප්‍රමුඛ පෙළේ ව්‍යාපාරිකයන් කිහිප දෙනෙකු හරහා විපක්ෂයේ පිරිස් සම්බන්ධ කර ගැනීමේ මෙහෙයුමක් ක්‍රියාත්මක වන බව ඔහු පවසයි.

කෙසේ වෙතත්, රජය තුළ සිටින ඇතැම් කණ්ඩායම් (විශේෂයෙන් පැලවත්ත කණ්ඩායම) විපක්ෂයේ පිරිස් එක් කර ගැනීමට විරෝධය පළ කරමින් සිටින බවත්, මෙය ජනතා විමුක්ති පෙරමුණ අභ්‍යන්තරයේ යම් පිපිරීමකට පවා හේතු විය හැකි බවත් ඔහු වැඩිදුරටත් සඳහන් කරයි.

ආර්ථිකය සම්බන්ධයෙන් මහ බැංකු අධිපතිවරයා පවා අනාගතය අවිනිශ්චිතයි යනුවෙන් පවසන පසුබිමක, රජය මුහුණ දී සිටින මෙම සුලියෙන් ගොඩ ඒමට ජනාධිපතිවරයා ගන්නා මෙම නව ක්‍රියාමාර්ගය කෙතරම් දුරට සාර්ථක වේද යන්න ඉදිරි කාලයේදී තීරණය වනු ඇතැයි හෙතෙම කියා සිටී.