අරක්කු පරිභෝජනය වැඩිවෙයි.. බදු ආදායමත් ඉහලට..

 ශ්‍රී ලංකාවේ මත්පැන් පරිභෝජනය කැපී පෙනෙන ලෙස ඉහළ ගොස් ඇති බව මධ්‍යසාර හා මත්පැන් තොරතුරු මධ්‍යස්ථානය නිකුත් කළ නවතම සංඛ්‍යාලේඛන මගින් අනාවරණය වේ. 

2025 වසරේ දත්ත විශ්ලේෂණය කිරීමේදී, බීර නිෂ්පාදනය 5%කින් සහ අනෙකුත් මධ්‍යසාර නිෂ්පාදනය 17%කින් වර්ධනය වී ඇති බව නිරීක්ෂණය වී තිබේ.

පසුගිය වසරවලට සාපේක්ෂව මෙම වර්ධනයට ප්‍රධාන වශයෙන් බලපා ඇත්තේ මත්පැන් මිලෙහි පවතින ස්ථාවරත්වයයි. 

2024 වසර ආරම්භයෙන් පසුව මේ දක්වා මත්පැන් මිලෙහි කිසිදු වෙනසක් සිදු වී නොමැත.උද්ධමනය සහ පුද්ගල ආදායම් ඉහළ යාමට සාපේක්ෂව මත්පැන් මිල නොවෙනස්ව පැවතීම හේතුවෙන්, සාමාන්‍ය ජනතාවට මත්පැන් මිලදී ගැනීම වඩාත් පහසු වී ඇත 

2023 වසර මත්පැන් බදු 20%කින් ඉහළ නැංවීම නිසා අලෙවිය ලීටර මිලියන 8.3කින් පහත වැටුණු අතර, රජයේ බදු ආදායම රුපියල් බිලියන 11.6කින් වර්ධනය විය.

2024 වසර බදු තවදුරටත් 20%කින් වැඩි කිරීම නිසා අලෙවිය ලීටර 430,000කින් අඩු වූ අතර බදු ආදායම රුපියල් බිලියන 42.15ක් දක්වා ඉහළ ගොස් තිබුණි.

පවතින තත්ත්වය මත රජයේ සුරාබදු ආදායම යම් ප්‍රමාණයකින් වර්ධනය වුවද, මත්පැන් භාවිතය ඉහළ යාම නිසා රටට අත්වන සෞඛ්‍යමය හා සමාජීය හානිය එම බදු ආදායමට වඩා බෙහෙවින් බරපතළ බව මධ්‍යසාර හා මත්පැන් තොරතුරු මධ්‍යස්ථානය අවධාරණය කරයි.