අපි බලය ගත්තේ නොසෑහෙන දුක් විදලා.. එහෙම ගත්ත බලය ලේසියෙන් දෙන්නෑ..

 දේශපාලන බලය ලබා ගැනීම යනු "ක්ෂණික නූඩ්ල්ස්" පිළියෙළ කරනවාක් මෙන් හදිසියේ කළ හැක්කක් නොවන බවත්, ඒ සඳහා විශාල කැපවීමක් සහ ඉවසීමක් අවශ්‍ය බවත් ජාතික ජනබලවේගයේ පාර්ලිමේන්තු මන්ත්‍රී ලක්ෂ්මන් නිපුණආරච්චි මහතා අවධාරණය කරයි.

මාධ්‍ය වෙත අදහස් දක්වමින් මන්ත්‍රීවරයා කියා සිටියේ වත්මන් විපක්ෂයට කිසිදු ඉවසීමක් නොමැති බවයි. ඔවුන් බලය ලබා ගැනීමට නම් කොහේ හෝ පන්තියකට ගොස් හෝ ඉවසීම ප්‍රගුණ කළ යුතු බව ඔහු උපහාසාත්මකව පවසා සිටියේය.

පන්නරය ලැබූ ගමනක් ජාතික ජනබලවේගය බලයට පැමිණියේ දීර්ඝකාලීන ක්‍රියාවලියක ප්‍රතිඵලයක් ලෙස බව පෙන්වා දුන් නිපුණආරච්චි මහතා, තම පක්ෂය 60 දශකයේ සිට විවිධ අභියෝගවලට මුහුණ දෙමින් පැමිණි ගමන සිහිපත් කළේය. 

පසුගිය පාලකයින්ගෙන් "ගුටි කමින්", පීඩාවලට යටත්වෙමින් ලැබූ ඒ පන්නරය සහ ජනතාව ඒකරාශී කිරීම හරහා ගොඩනැගූ බලය ලෙහෙසියෙන් පරාජය කළ නොහැකි බව ඔහු ප්‍රකාශ කළේය.

විපක්ෂයට උපදෙස් විපක්ෂය අමතමින් මන්ත්‍රීවරයා වැඩිදුරටත් කියා සිටියේ, ජාතික ජනබලවේගයේ නායකයින්ට වඩා දක්ෂ දේශපාලනඥයන් වීමට උත්සාහ කරන්නේ නම් පමණක් විපක්ෂයට බලය සම්බන්ධයෙන් බලාපොරොත්තුවක් තබා ගත හැකි බවයි. එසේ නොමැතිව විහිළු සහගත කතා පවසමින් සිටීමෙන් පලක් නොවන බවත්, දේශපාලනඥයෙකු සතුව තිබිය යුතු ප්‍රධානතම ගුණාංග වන්නේ විනය, සංයමය සහ ඉවසීම බවත් ඔහු පෙන්වා දුන්නේය.

"මේ විදියට ගත්තු බලයක් ලේසියෙන් වෙනස් කරන්නවත්, පරද්දන්නවත් බැහැ" යනුවෙන් පවසමින් මන්ත්‍රීවරයා තම පක්ෂයේ දේශපාලන ස්ථාවරත්වය පිළිබඳව විශ්වාසය පළ කළේය.