සුරේෂ් සලේට ත‍්‍රස්තවාදී චෝදනා..

 මෙරට රාජ්‍ය බුද්ධි අංශය තුළ ත්‍රස්තවාදී කල්ලි නඩත්තු කරමින් දීර්ඝ කාලීනව සිදු වූ බරපතළ ක්‍රියාවලියක් පිළිබඳව සමාජ හා සාමයික කේන්ද්‍රයේ කැඳවුම්කරු චමීර පෙරේරා මහතා කරුණු අනාවරණය කරයි.

ඔහු පවසන්නේ බුද්ධි අංශය තුළ ක්‍රියාත්මක වූයේ "බුද්ධි අංශ ත්‍රස්තවාදයක්" බවයි.

පසුගිය කාලසීමාව පුරා සිදු වූ විමර්ශන යට ගැසීම සඳහා සුරේෂ් සලෙයි වැනි පුද්ගලයන් යොදාගත් බවට චෝදනා කරන පෙරේරා මහතා, බුද්ධි අංශයේ කටයුතු සම්බන්ධයෙන් දැඩි විවේචනයක් එල්ල කළේය. 

ඔහුගේ අදහසට අනුව, බුද්ධි අංශ වෙත බඳවාගෙන තිබුණේ හමුදා සෙබළුන් නොව, හිටපු එල්.ටී.ටී.ඊ ත්‍රස්තවාදීන්, කරුණා අම්මාන්ගේ සහ පිල්ලෙයාන්ගේ ත්‍රස්තවාදී කල්ලිවල සාමාජිකයන්ය.

මෙම පිරිස් බුද්ධි අංශ වෙත බඳවාගෙන ඔවුන්ට රජයේ වැටුප් ගෙවා ඇති බවත්, පාස්කු ප්‍රහාරයේ මහ මොළකරු ලෙස සැලකෙන සහරාන් හෂීම් ඇතුළු පිරිස රැඳී සිටියේ ද මෙලෙස වැටුප් ලැබූ කණ්ඩායම් තුළ බවත් ඔහු වැඩිදුරටත් අනාවරණය කළේය.

"මේ බෙදුම් රේඛාව ඉතා පැහැදිලියි. අද සටන පවතින්නේ මිනීමරුවන් සහ මේ රටේ පොදු ජනතාව අතරයි," යැයි පැවසූ ඒ මහතා, මෙම මිනීමරුවන් නැවත එළියට ආවොත් ජනතාව ඔවුන්ට එරෙහිව පාරට බසිනු ඇති බවත්, මිනීමරුවන්ට මේ රටේ නැවත බලය අත්පත් කරගැනීමට ජනතාව ඉඩ නොදෙන බවත් අවධාරණය කළේය.