ශිරන්තිට ලොකු කේස් එකක්.. අල්ලසට පැමිණිලි..

2012 සහ 2013 වසරවල අම්පාර සහ අනුරාධපුර දිස්ත්‍රික්ක කේන්ද්‍ර කරගනිමින් පවත්වන ලද ‘දැයට කිරුළ’ ජාතික ප්‍රදර්ශන මාලාවේදී මහා පරිමාණ මූල්‍ය අක්‍රමිකතාවක් සිදුව ඇති බවට අල්ලස් හෝ දූෂණ චෝදනා විමර්ශන කොමිෂන් සභාව වෙත අද දින පැමිණිල්ලක් ගොනු කෙරුණි.

අල්ලස, දූෂණය සහ නාස්තියට එරෙහි පුරවැසි බලය සංවිධානයේ කැඳවුම්කරු කාමන්ත තුෂාර මහතා විසින් මෙම පැමිණිල්ල ඉදිරිපත් කර ඇත. එහි සඳහන් වන්නේ අදාළ ප්‍රදර්ශනවල ඉසව් කළමනාකරණ සේවා මෙන්ම ඝන අපද්‍රව්‍ය බැහැර කිරීමේ කටයුතු නිසි ටෙන්ඩර් පටිපාටියකින් බැහැරව සිදුකර ඇති බවයි.

මේ හරහා මහජන බදු මුදල් අවභාවිත කරමින් ශිරන්ති රාජපක්ෂ මහත්මිය රුපියල් කෝටි 12 කට අධික මුදලක් ද, එවකට විෂය භාර අමාත්‍යවරයා ලෙස කටයුතු කළ රංජිත් සියඹලාපිටිය මහතා රුපියල් කෝටි 8 කට වැඩි මුදලක් ද වංචා කර ඇති බවට ඔහු චෝදනා කරයි.

මාධ්‍ය වෙත අදහස් දක්වමින් කැඳවුම්කරු කියා සිටියේ මෙම දූෂණ ක්‍රියාවලිය සනාථ කිරීමට අවශ්‍ය සියලුම ලිඛිත සාක්ෂි සහ ලියකියවිලි තමන් සතුව පවතින බවයි.

ඇතැම් විට අදාළ රාජ්‍ය ආයතනවලින් මෙම ලිපිගොනු අතුරුදන් වීමේ ප්‍රවණතාවක් පැවතිය හැකි වුවද, තමන් සතු ලේඛන ඉතා ආරක්ෂිත බාහිර ස්ථාන කිහිපයක තැන්පත් කර ඇති බැවින් ඕනෑම අවස්ථාවක ඒවා ඉදිරිපත් කිරීමට සූදානම් බව ඔහු අවධාරණය කළේය.

මෙම මූල්‍ය සාපරාධී ක්‍රියාව සම්බන්ධයෙන් කඩිනම් හා විධිමත් විමර්ශනයක් පවත්වා, වගකිවයුත්තන්ට එරෙහිව නීතිමය පියවර ගන්නා ලෙසත්, අවභාවිත වූ මහජන මුදල් නැවත රජයට පවරා ගැනීමට කටයුතු කරන ලෙසත් පුරවැසි බලය සංවිධානය අල්ලස් කොමිසමෙන් ඉල්ලා සිටියි.