‘සුවසැරිය දැන් හමුදා පාලනයක්..’ සුවසැරිය සේවකයන් ජනාධිපති කාර්යාලය ඉදිරියේ විරෝධතා..

 1990 සුවසැරිය ගිලන්රථ සේවයේ සේවකයින් පිරිසක් සිය සේවාව වහාම රජයට පවරා ගන්නා ලෙසත්, තමන් මුහුණ දෙන පරිපාලන ගැටලු විසඳන ලෙසත් ඉල්ලමින් අද දහවල් ජනාධිපති ලේකම් කාර්යාලය ඉදිරිපිට සාමකාමී විරෝධතාවයක නිරත වූහ.

වසර 10කට අධික කාලයක් පුරා මෙරට ජනතාවට ඉටුකළ විශිෂ්ට සේවයට නිසි ඇගයීමක් ලබාදෙමින්, තමන් රජයේ ස්ථිර සේවකයින් ලෙස බඳවා ගන්නා ලෙස ඔවුහු මෙහිදී බලකර සිටියහ.

විරෝධතාවයට එක්වූ සේවකයෙකු සඳහන් කළේ 2016 වසරේ ඉන්දීය රජයේ ආධාර මත මෙරට ආරම්භ වූ සුවසැරිය සේවය, එදා සිට මේ දක්වා පාස්කු ප්‍රහාරය, විවිධ ස්වභාවික ආපදා සහ කොවිඩ් වසංගතය වැනි තීරණාත්මක අවස්ථාවලදී නොපිරිහෙලා සිය රාජකාරිය ඉටුකර ඇති බවයි. 

කෙසේ වෙතත්, වසර 10ක් පුරා සේවය කළද තවමත් තමන් ස්ථිර සේවකයින් නොවන බවත්, රජයේ සේවකයින්ට හිමිවන කිසිදු වරප්‍රසාදයක් තමන්ට හිමි නොවන බවත් සේවකයෝ චෝදනා කරති.

සුවසැරිය ආයතනය තුළ දැනට පවතින "මිලිටරි පාලන ක්‍රමය" තමන්ට දැඩි පීඩනයක් එල්ල කරන බව සේවකයින් මෙහිදී අනාවරණය කළේය. විශේෂයෙන්ම නාවික හමුදාවේ ඉහළ නිලධාරීන් ආයතනයේ සභාපති , මානව සම්පත් අංශය සහ විගණන අංශය වැනි තීරණාත්මක තැන්වල කටයුතු කරන බවත්, රෝගීන් සමඟ ඉතා සංවේදී ලෙස කටයුතු කරන තමන්ට මෙවැනි මිලිටරි පාලනයක් යටතේ සේවය කිරීම දුෂ්කර වී ඇති බවත් ඔවුහු පැවසූහ. මීට අමතරව, වසර ගණනාවක් සේවය කළ සේවකයින් හට අත්තනෝමතික ලෙස ස්ථාන මාරු ලබාදීම මෙම විරෝධතාවයට ආසන්නතම හේතුව වී තිබේ.

මෙම විරෝධතාවය සඳහා දිවයින පුරා සේවය කරන 1600කට අධික සේවක මණ්ඩලයෙන් 400කට ආසන්න පිරිසක් සහභාගී වී සිටියහ.

සමාජ මාධ්‍ය හරහා පැතිර යන පුවත් ප්‍රතික්ෂේප කරමින් සේවකයින් අවධාරණය කළේ, රෝගීන්ගේ ජීවිත අනතුරේ හෙළමින් තමන් මෙම විරෝධතාවයට නොපැමිණි බවත්, සේවයේ යෙදී සිටින අනෙක් පිරිස රෝගී සත්කාර කටයුතු අඛණ්ඩව සිදුකරන බවත්ය.

විරෝධතාවය අවසානයේ සිය ඉල්ලීම් ඇතුළත් සන්දේශයක් ජනාධිපති ලේකම් කාර්යාලය වෙත භාර දීමටද සේවකයින් කටයුතු කළහ.