රජය විසින් මිලදී ගැනීමට නියමිතව ඇති වාහන 1,750 ක සමස්ත තොගයෙන් ජනතා විමුක්ති පෙරමුණේ (ජවිපෙ) පක්ෂ සාමාජිකයන්ට කොටසක් ලබා දීමට සූදානම් වන බවට හිටපු අමාත්‍යවරයෙකු වන පාඨලී චම්පික රණවක මහතා චෝදනා කරයි.
රණවක මහතා පෙන්වා දෙන්නේ, රටේ සේවය කරන වෘත්තීයවේදීන්ට කලක් ලබා දුන් පහසුකමක් වූ වාහන බලපත්‍රය අහෝසි කර ඇති බවයි.
ඊට සමගාමීව, පන්ති පහට ගිය තමන්ගේ පක්ෂයේ කාඩර්වරුන්ට ඩබල් කැබ් රථ ලබා දීමට කටයුතු කිරීමේ උත්සාහයක් ඇති බවට ඔහු ප්‍රකාශ කරයි.
ඔහු අවධාරණය කරන්නේ, වෘත්තිකයන්ගේ වාහන බලපත්‍රය යටතේ හිමි වූයේ 30%ක බදු සහනයක් පමණක් බවත්, එය ඔවුන් රට තුළ රඳවා තබා ගැනීම සඳහා ලබා දුන් දිරිගැන්වීමක් වූ බවත්ය.
2015 වසරෙන් පසු කිසිදු රජයක් දේශපාලනඥයන් සඳහා මෙවැනි වාහන බලපත්ර ලබා දී නොමැති බවද හිටපු ඇමතිවරයා සිහිපත් කළේය.
මෙම ක්‍රියාවෙහි මූලික ගැටලුව ලෙස චම්පික රණවක මහතා දකින්නේ, පාලකයන් තමන්ගේ වරප්‍රසාද දිගටම භුක්ති විඳිමින්, රටට සේවය කරන වෘත්තිකයන්ගේ වරප්‍රසාද කප්පාදු කිරීමයි.
“පාලකයන් තමන්ගේ වරප්‍රසාද ද කප්පාදු කළේ නම්, වෘත්තිකයන්ගේ වරප්‍රසාද කප්පාදු කිරීම සාධාරණ විය හැකි නමුත්, අද පාලකයන් වරප්‍රසාද ලබමින් වෘත්තිකයන්ගේ ඒවා අහිමි කොට තිබේ.” යැයි ඔහු සඳහන් කළේය.
මෙවැනි පියවරයන් හේතුවෙන් රටේ වෘත්තීයවේදීන් අධෛර්යමත් වන බවත්, එය සමස්ත රටේ සංවර්ධනයට අහිතකර බලපෑමක් ඇති කරන බවත් හිටපු අමාත්‍යවරයා අවසන් වශයෙන් අනතුරු අඟවා සිටියේය.
