මුතුරාජවෙල ගොඩකරන්න අත යටින් අනුමැතිය..- අගරදගුරු

 

මුතුරාජවෙල තෙත්බිම් කලාපය තුළ සිදුවන අනවසර ඉදිකිරීම් සහ පද්ධතිය විනාශ වීම වැළැක්වීම සඳහා "මුතුරාජවෙල සංවර්ධන අධිකාරිය" නමින් විශේෂ බලතල සහිත ආයතනයක් පිහිටුවන ලෙස අගරදගුරු අතිඋතුම් මැල්කම් කාදිනල් රංජිත් හිමිපාණන් රජයෙන් ඉල්ලා සිටිති. අගරදගුරු හිමිපාණන් මේ බව පැවසුවේ මුතුරාජවෙල තෙත්බිම් කලාපය රැක ගැනීම පිළිබඳව අද පෙරවරුවේ අගරදගුරු මැදුරේදී පැවැති විශේෂ සාකච්ඡාවකදීය.

මෙම සාකච්ඡාව සඳහා ගම්පහ දිස්ත්‍රික් සම්බන්ධීකරණ කමිටු සභාපති මහින්ද ජයසිංහ මහතා ඇතුළු රාජ්‍ය නිලධාරීන් පිරිසක් එක්ව සිටියහ.

මෙහිදී අදහස් දැක්වූ කාදිනල් හිමිපාණන් අවධාරණය කළේ මුතුරාජවෙල යනු සමස්ත පද්ධතියේම "පෙනහැල්ලක්" බඳු ස්වභාවික උරුමයක් බවයි. "ස්වභාවධර්මය කියන්නේ එකම පද්ධතියක්. ඒ නිසා ඒකට අත ගැහැව්වොත් ඒකේ ප්‍රතිඵල භයානක වෙන්න පුළුවන්," යැයි උන්වහන්සේ අනතුරු ඇඟවූහ. 

මෑතකදී ගම්පහ නගරය දෙවතාවක් ජලයෙන් යටවීමට ප්‍රධානතම හේතුව මුතුරාජවෙල කලාපය අවිධිමත් ලෙස ගොඩකිරීම බව උන්වහන්සේ පෙන්වා දුන්හ.

පසුගිය වසර 50-60 ක කාලය පුරා කර්මාන්තශාලා සහ විවිධ ව්‍යාපෘති සඳහා අසම්මත ලෙස ඉඩම් ගොඩකිරීම හේතුවෙන් මෙම තත්ත්වය උග්‍ර වී ඇති බවත්, දැනට ඉතිරිව ඇති ප්‍රදේශ පවා පිළිවෙලක් නැතිව සංවර්ධනය කිරීමට උත්සාහ කරන බවත් අගරදගුරුතුමෝ පැවසූහ. 

විශේෂයෙන්ම, රජයේ ඇතැම් ආයතන විසින් විවිධ පුද්ගලයන්ට සහ සංවිධානවලට "යටින්" අවසර ලබාදීමේ ප්‍රතිපත්තිය නිසා විශාල විනාශයක් සිදුවන බවට උන්වහන්සේ චෝදනා කළහ.

නීතිමය පදනමක් සහිත අධිකාරියක අවශ්‍යතාවය මුතුරාජවෙල තෙත්බිම් කලාපය සහ එහි ජල ප්‍රවාහන කටයුතු සම්බන්ධයෙන් පූර්ණ බලතල සහිත විශේෂ අධිකාරියක් පිහිටුවීමේ අවශ්‍යතාවය උන්වහන්සේ මෙහිදී යෝජනා කළහ. එම අධිකාරියේ අවසරයකින් තොරව කිසිදු ගොඩකිරීමක් හෝ ඉදිකිරීමක් කළ නොහැකි වන පරිදි ශක්තිමත් නීතිමය පදනමක් සකස් කළ යුතු බව උන්වහන්සේ වැඩිදුරටත් සඳහන් කළහ.

ඉදිරි ක්‍රියාමාර්ග මෙහිදී අදහස් දැක්වූ මහින්ද ජයසිංහ මහතා ප්‍රකාශ කළේ මුතුරාජවෙල සම්බන්ධයෙන් පත්කළ විශේෂඥ අනුකමිටු වාර්තාව මේ වන විට ලැබී ඇති බවයි. 

එම වාර්තාව පිළිබඳව ඉදිරි කටයුතු සාකච්ඡා කිරීම සඳහා ලබන 17 වනදා පරිසර අමාත්‍යාංශය සමඟ විශේෂ සාකච්ඡාවක් පැවැත්වීමට නියමිත බවද මෙහිදී අනාවරණය විය