පිටසක්ල ජීවීන් ගැන ඇමරිකා රහස් ෆයිල් ට‍්‍රම්ප් එලියට දමයි..

හඳුනා නොගත් පියාසර වස්තූන් (UFO) සහ පිටසක්වල ජීවීන් පිළිබඳ රජය සතු සියලුම වාර්තා හඳුනාගෙන ඒවා ප්‍රසිද්ධියට පත් කරන ලෙස අමෙරිකානු ජනාධිපති ඩොනල්ඩ් ට්‍රම්ප් විසින් ආරක්ෂක දෙපාර්තමේන්තුව ඇතුළු ෆෙඩරල් ආයතනවලට නියෝග කර තිබේ.

තම 'Truth Social' සමාජ මාධ්‍ය ජාලය ඔස්සේ විශේෂ ප්‍රකාශයක් කරමින් ජනාධිපතිවරයා සඳහන් කළේ, අදාළ ආයතන විසින් පිටසක්වල ජීවීන් සහ හඳුනා නොගත් ගුවන් සංසිද්ධීන් (UAP) සම්බන්ධ රජයේ ලිපිගොනු හඳුනාගෙන ඒවා මුදා හැරීමේ ක්‍රියාවලිය ආරම්භ කළ යුතු බවයි.

මෙම කරුණු අතිශය සංකීර්ණ මෙන්ම ඉතා වැදගත් වන බැවින් ඒ හා සම්බන්ධ සියලු තොරතුරු මෙයට ඇතුළත් විය යුතු බව ඔහු වැඩිදුරටත් අවධාරණය කළේය.

ජනාධිපතිවරයාගේ මෙම පියවර සඳහා පාදක වී ඇත්තේ හිටපු ජනාධිපති බරක් ඔබාමා විසින් පිටසක්වල ජීවීන් සම්බන්ධයෙන් මෑතකදී කරන ලද ප්‍රකාශයකින් පසුව ඇති වූ මහජන උනන්දුවයි.

පිටසක්වල ජීවීන් "සැබෑ" විය හැකි බවට ඔබාමා ඉඟි කර තිබූ අතර, ට්‍රම්ප් ඒ පිළිබඳව ඔබාමා විවේචනය කරමින් කියා සිටියේ එවැනි රහස්‍ය තොරතුරු පිළිබඳව අදහස් දැක්වීමෙන් ඔහු විශාල වැරැද්දක් කර ඇති බවයි.

කෙසේ වෙතත්, බරක් ඔබාමා පසුව සිය ප්‍රකාශය පැහැදිලි කරමින් කියා සිටියේ, විශ්වයේ විශාලත්වය අනුව ජීවය පැවතීමේ සම්භාවිතාව වැඩි වුවද, පෘථිවියට පිටසක්වල ජීවීන් පැමිණ ඇති බවට තම ජනාධිපති ධුර කාලය තුළ කිසිදු සාක්ෂියක් දැක නොමැති බවයි.

මෙම ලිපිගොනු ප්‍රසිද්ධ කිරීමේ තීරණයට රිපබ්ලිකන් සහ ඩිමොක්‍රටික් පක්ෂ දෙකෙහිම නියෝජිතයන්ගෙන් සහය ලැබී තිබේ. හඳුනා නොගත් ගුවන් සංසිද්ධීන් පිළිබඳ විමර්ශනය කරන කොන්ග්‍රස් කාර්ය සාධක බලකායේ සභාපතිනී ඇනා පෝලිනා ලුනා මෙම තීරණය අගය කර ඇති අතර, ඩිමොක්‍රටික් සෙනෙට් සභික ජෝන් ෆෙටර්මන් ප්‍රකාශ කළේ ලෝකය මෙම තොරතුරු දැන ගැනීමට සුදුසු බවයි.

මීට පෙර 2024 වසරේදී පෙන්ටගනය විසින් නිකුත් කරන ලද වාර්තාවක සඳහන් වූයේ UFO යනු බොහෝ දුරට ඔත්තු බැලීමේ යානා, චන්ද්‍රිකා හෝ කාලගුණ බැලුම් වන අතර, ඒවා පිටසක්වල තාක්ෂණයන් බවට නිසි සාක්ෂි නොමැති බවයි. මෙම නව නියෝගයත් සමඟ රජය සතු රහස්‍ය දර්ශන, ඡායාරූප සහ වාර්තා රැසක් ඉදිරියේදී මහජනතාවට දැකගත හැකි වනු ඇතැයි අපේක්ෂා කෙරේ