ගල් අගුරු නැවු අටකින් පාඩුව බිලියන හතහමාර පැනලා..- CEB ලොක්කා අමාත්‍යංශ ලේකම්ට ලියයි..

 

මෙරටට ආනයනය කරන ලද බාල ගල්අඟුරු භාවිතයෙන් විදුලිය උත්පාදනය කිරීම හේතුවෙන් ලංකා විදුලිබල මණ්ඩලයට රුපියල් මිලියන 7,500 කට අධික සෘජු මූල්‍ය අලාභයක් සිදුව ඇති බව අනාවරණය වේ. 

මේ පිළිබඳ තොරතුරු ඇතුළත් ලේඛනයක් විදුලි බල මණ්ලයේ කළමනාකරු විසින් විදුලිබල අමාත්‍යාංශයේ ලේකම්වරයා වෙත යොමු කර තිබේ.

යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාව විසින් මතු කරන ලද ප්‍රශ්නවලට පිළිතුරු වශයෙන් මෙම දත්ත ඉදිරිපත් කර ඇත.

ලබා දී ඇති දත්ත අනුව, ගල්අඟුරු නැව් වාර 8 ක් ආශ්‍රිතව මෙම අලාභය ගණනය කර ඇත.

මෙම අලාභය ගණනය කිරීමේදී පවතින නරකම තත්ත්වය සලකා බලා ඇති අතර, ගල්අඟුරු වල පවතින බාල ගුණාත්මකභාවය හේතුවෙන් සිදුවන බලශක්ති හිඟය පියවා ගැනීමට කැලණිතිස්ස ඒකාබද්ධ චක්‍රීය බලාගාරයෙන් විදුලිය මිලදී ගැනීමේ පිරිවැය ඒකකයකට රුපියල් 57.53 ක් ලෙස සලකා ඇත.

තවද, මෙම ගල්අඟුරු තොග දහනය කිරීමේදී ඒ ඒ ඒකකවල සැබෑ දහන වේගය (Specific Coal Consumption) සලකා බලා මෙම ගණනය කිරීම් සිදු කර තිබේ. 

කෙසේ වෙතත්, මෙම අලාභයන් ගණනය කිරීමේදී සැපයුම්කරුගෙන් අය කර ගත යුතු දඩ මුදල් මෙතෙක් අඩු කර නොමැති බවද එම වාර්තාවේ සඳහන් වේ.

නැව් වාර 1 සිට 6 දක්වා අදාළ රසායනාගාර වාර්තා මීට පෙර පාර්ලිමේන්තු කාරක සභාව වෙත ඉදිරිපත් කර ඇති අතර, අනෙකුත් සියලුම නැව් වාර වල පරීක්ෂණ වාර්තාද වත්මන් වාර්තාව සමඟ ඉදිරිපත් කර ඇත.