තෙල් බැරලය ඩොලර් 200ට සැරසෙන්න.. හෝමුස් නැවුවලට පහර දෙමින් ඉරානය

 

ඇමරිකානු සහ ඊශ්‍රායල ඒකාබද්ධ ප්‍රහාර හමුවේ වුවද තම හමුදා ශක්තිය නොබිඳුණු බව පසක් කරමින් ඉරානය පර්සියානු ගල්ෆ් කලාපයේ වෙළඳ නෞකා වෙත ප්‍රහාර එල්ල කිරීම ආරම්භ කර තිබේ.

කලාපීය ආරක්ෂාව අස්ථාවර වීම හේතුවෙන් ලෝක වෙළඳපොළේ බොරතෙල් බැරලයක මිල ඇමරිකානු ඩොලර් 200 දක්වා ඉහළ යා හැකි බවට ඉරානය අනතුරු අඟවා ඇත.

පසුගිය බදාදා දිනයේදී ඉරාන හමුදා විසින් ගල්ෆ් කලාපයේ අවහිර කර ඇති සමුද්‍ර සන්ධිය හරහා ගමන් කිරීමට උත්සාහ කළ වෙළඳ නෞකා කිහිපයකට ප්‍රහාර එල්ල කර තිබේ.

මේ අතරින් තායිලන්ත ධජය යටතේ යාත්‍රා කළ නෞකාවක් ගිනි ගැනීමට ලක්ව ඇති අතර, එහි සිටි කාර්ය මණ්ඩලයේ තිදෙනෙකු අතුරුදහන් වී ඇති බව වාර්තා වේ. මීට අමතරව ජපාන සහ මාෂල් දූපත්වලට අයත් නෞකා ද ප්‍රහාරයන්ගෙන් හානියට පත්ව ඇත.

ලෝක බොරතෙල් සැපයුමෙන් පහෙන් එකක් ගමන් කරන හෝමුස් සමුද්‍ර සන්ධිය අවහිර වීම හේතුවෙන් 1970 දශකයෙන් පසු ලෝකය මුහුණ දෙන දරුණුතම බලශක්ති අර්බුදය නිර්මාණය වී තිබේ. තත්ත්වය පාලනය කිරීම සඳහා ජාත්‍යන්තර බලශක්ති ඒජන්සිය (IEA) විසින් ගෝලීය සංචිතවලින් බැරල් මිලියන 400 ක තෙල් ප්‍රමාණයක් වෙළඳපොළට මුදා හැරීමට යෝජනා කර ඇති අතර වොෂින්ටනය ද ඊට අනුමැතිය ලබා දී ඇත.

ඊශ්‍රායල ආරක්ෂක අමාත්‍ය ඊශ්‍රායෙල් කැට්ස් ප්‍රකාශ කර ඇත්තේ ඉරානයට එරෙහි මෙම මෙහෙයුම කිසිදු කාලසීමාවකින් තොරව තම අරමුණු ඉටු කරගන්නා තෙක් ඉදිරියට ගෙන යන බවයි. කෙසේ වෙතත්, ඉරානයේ පාලන පද්ධතිය මෙම යුද්ධයෙන් පසුව ද ශක්තිමත්ව පවතිනු ඇති බවට ඊශ්‍රායල බලධාරීන් දැන් පෞද්ගලිකව පිළිගන්නා බව රොයිටර් පුවත් සේවය වාර්තා කරයි.

ඇමරිකානු ජනාධිපති ඩොනල්ඩ් ට්‍රම්ප් පවසා ඇත්තේ ඉරානය තුළ ඉලක්ක කිරීමට තවත් දේවල් ඉතිරිව නොමැති තරම් බවත්, තමාට අවශ්‍ය ඕනෑම මොහොතක මෙම යුද්ධය අවසන් කළ හැකි බවත්ය.

පසුගිය පෙබරවාරි 28 වැනිදා ඇමරිකානු හා ඊශ්‍රායල ගුවන් ප්‍රහාර ආරම්භ වූ දා සිට මේ දක්වා ඉරාන වැසියන් 1,300 කට අධික පිරිසක් මියගොස් ඇති බව එරට එක්සත් ජාතීන්ගේ තානාපතිවරයා පවසයි. ඉරාන ප්‍රහාර හමුවේ ඊශ්‍රායල වැසියන් 11 දෙනෙකු සහ ඇමරිකානු සෙබළුන් 7 දෙනෙකු ද ජීවිතක්ෂයට පත්ව ඇත.