යුද්දෙ නිසා විකුණන්න බැරිවෙන තේ එකතු කරලා තියලා පස්සෙ විකුණනවා..

 

මැදපෙරදිග කලාපයේ මේ වන විට ඇති වී තිබෙන යුදමය වාතාවරණය හේතුවෙන් මෙරට තේ කර්මාන්තයට යම් බලපෑමක් එල්ල වුවද නිෂ්පාදනය අඩු නොකර අලෙවි කරගත නොහැකි වන තේ තොග ගබඩා කර තබා පසුව වෙළෙඳපොළට නිකුත් කරන බව වැවිලි සහ ප්‍රජා යටිතල පහසුකම් ඇමැති සමන්ත විද්‍යාරත්න පැවසීය.

ඇමැතිවරයා මේ බව පවසා සිටියේ මැදපෙරදිග කලාපයේ මේ වන විට ඇති වී තිබෙන යුදමය තත්ත්වය හේතුවෙන් තේ කර්මාන්තයට එල්ල වී ඇති සහ ඉදිරියේදී එල්ල විය හැකි බලපෑම් පිළිබඳව වැවිලි අමාත්‍යාංශයේ පැවැති විශේෂ සාකච්ඡාවකදීය.

හෙතෙම එහිදී කියා සිටියේ ඇතිවී තිබෙන මෙම තත්ත්වයත් සමග මූල්‍ය සහන ලබාදීම සම්බන්ධයෙන් මුදල් අමාත්‍යාංශය සහ කැබිනට් මණ්ඩලය සමග සාකච්ඡා කිරීමට ද නියමිත බවයි.

හෙතෙම වැඩිදුරටත් මෙසේද පැවසීය.

“යුද්ධය පවතින්නේ ඊශ්‍රායලය, ඉරානය ඇමරිකාව සහ ආරාබිකරයේ රටවල්වල වුණත් යම් බලපෑමකට අපටත් ලක්වෙන්න වෙලා තියෙනවා. පෙරේදා (4 වැනිදා) අපි තේ වෙන්දේසියට ඉදිරිපත් කරපු තේ ප්‍රමාණයෙන් වෙනදට වඩා වැඩි ප්‍රමාණයක් අලෙවි නොවී ඉතිරි වුණා. ඒ වගේම මේ වන විට යටව තිබෙන තේ දලු සම්බන්ධයෙන් හා ගොවියගේ දලු ප්‍රමාණයට ලැබෙන මිලේ යම් අඩුවීමක් සිදුවෙලා තියෙනවා. ඒ වගේම අපේ තේවලට පෙරේදා (4 වැනිදා) ලැබුණු මිලේ යම්කිසි පසුබැස්මක් තියෙනවා. නමුත් නිෂ්පාදනය කරන තේ කිසිසේතම අඩු කරන්න බලාපොරොත්තුවක් නෑ. ඒවා අපට අලෙවි කරගන්න බැරි වුණොත් ඉතිහාසයෙත් කරලා තියෙනවා වගේ වෙනම ගබඩා කරලා පසුව හමුවන හොඳ අවස්ථාවක වෙළෙඳපොළට නිකුත් කරනවා. ඒකට අවශ්‍ය මූල්‍යමය හෝ යම් සහනයක් ලබාදීම සම්බන්ධයෙන් කැබිනට් එකෙත් මුදල් අමාත්‍යාංශය සමග වගේම ජනාධිපතිවරයා සමගත් සාකච්ඡා කරනවා.”

නිර්මාණි තිලකසිරි