ඉරානය සහ හෙස්බොල්ලා සංවිධානය විසින් එල්ල කරනු ලබන අඩු පිරිවැය සහිත නියමුවන් රහිත යානා (UAVs) හෙවත් ඩ්රෝන ප්රහාර හේතුවෙන් ඊශ්රායලයේ ගුවන් ආරක්ෂක පද්ධති පෙර නොවූ විරූ අභියෝගයකට මුහුණ දී සිටින බව වාර්තා වේ.
බැලස්ටික් මිසයිල කෙරෙහි වැඩි අවධානයක් යොමු වී තිබුණද, මෙම ඩ්රෝන යානා හඳුනාගැනීම සහ විනාශ කිරීම ඊට වඩා සංකීර්ණ කාර්යයක් බවට පත්ව ඇත.
පසුගිය පෙබරවාරි 28 වැනිදා ආරම්භ වූ යුද්ධයේ සිට මේ දක්වා ඉරානය විසින් ඊශ්රායලය වෙත ඩ්රෝන යානා 550ක් පමණ දියත් කර ඇති අතර, හෙස්බොල්ලා සංවිධානය උතුරු පෙරමුණෙන් දෛනිකව ප්රහාර එල්ල කරමින් සිටී.
මෙම ඩ්රෝන යානා රොකට් හෝ මිසයිල වලට වඩා සෙමින් ගමන් කළද, ඒවායේ ගමන් පථය කලින් පුරෝකථනය කිරීමට අපහසු වීම නිසා ඒවා හඳුනා ගැනීම අසීරු වී තිබේ.
මෙම තර්ජනයට මුහුණ දීම සඳහා ඊශ්රායලය ස්ථර කිහිපයකින් යුත් ආරක්ෂක ජාලයක් භාවිතා කරයි.
අයන් ඩෝම් (Iron Dome): කෙටි දුර රොකට් මෙන්ම ඩ්රෝන යානා ද විනාශ කිරීමට මෙය යොදා ගනී.
ඩේවිඩ්ස් ස්ලින්ග් (David’s Sling): වඩාත් සංකීර්ණ ගුවන් තර්ජන සහ කෲස් මිසයිල මර්දනය සඳහා මෙය භාවිතා වේ.
අයන් බීම් (Iron Beam): අධි බලැති ලේසර් තාක්ෂණය මගින් ඉතා අඩු පිරිවැයකින් ඩ්රෝන විනාශ කළ හැකි මෙම පද්ධතිය 2025 අගභාගයේදී ක්රියාත්මක කරන ලදී.
මීට අමතරව ඊශ්රායල ආරක්ෂක අංශ (IDF) ප්රහාරක ජෙට් යානා සහ හෙලිකොප්ටර් ද මේ සඳහා යොදා ගනී.
යුක්රේන-රුසියානු යුද්ධයෙන් ලබාගත් අත්දැකීම් ද මෙහිදී වැදගත් වී ඇත. රුසියාව විසින් යුක්රේනයට එරෙහිව ඉරාන තාක්ෂණය සහිත 'ෂාහෙඩ්' ඩ්රෝන යානා විශාල වශයෙන් භාවිතා කරන අතර, ඒවායේ ඇති අඩු පිරිවැය (ඇමරිකානු ඩොලර් 20,000-50,000) හේතුවෙන් ආරක්ෂක පද්ධති වෙහෙසට පත් කිරීමේ උපක්රමයක් ලෙස ඒවා යොදා ගැනේ.
යුක්රේනය මේ වන විට ශබ්දය මගින් ඩ්රෝන හඳුනාගැනීමේ නවීන තාක්ෂණයක් නිපදවා ඇති අතර, ඊශ්රායල අගමැති බෙන්ජමින් නෙතන්යාහු ද මේ සම්බන්ධයෙන් යුක්රේන සහාය අපේක්ෂා කරන බව වාර්තා වේ. ආරක්ෂක විශ්ලේෂකයන් පවසන්නේ ඩ්රෝන යානා පමණක් යුද්ධයක් ජය ගැනීමට ප්රමාණවත් නොවන නමුත්, ඒවා වෙනත් ප්රබල අවි ආයුධ සමඟ මිශ්ර කර භාවිතා කිරීම මගින් ප්රතිමල්ලවයන්ට දැඩි පීඩනයක් එල්ල කළ හැකි බවයි.
