ඇමරිකා ඊශ‍්‍රායල ප‍්‍රහාරවලින් ඉරානයේ අධ්‍යාත්මික නායක අයතුල්ලා කමේනි හා පවුලේ සියල්ලන් මරුට...

 

ඉරාන උත්තරීතර නායක අයතුල්ලා අලි කමේනි අමෙරිකානු සහ ඊශ්‍රායල හමුදා එල්ල කළ ප්‍රහාරයකින් ඝාතනය වී ඇති බව ඉරාන රජය නිල වශයෙන් තහවුරු කරයි.

ටෙහෙරාන් අගනුවර සහ ඉරානයේ අනෙකුත් ප්‍රදේශ ඉලක්ක කර ගනිමින් මෙම ඒකාබද්ධ ප්‍රහාරය දියත් කර ඇත.

ඉරාන රාජ්‍ය මාධ්‍ය වාර්තා කරන අන්දමට, මෙම ප්‍රහාරයෙන් අලි කමේනිගේ දියණිය, මුනුබුරා සහ බෑණනුවන්ද ජීවිතක්ෂයට පත්ව තිබේ. අලි කමේනි සිය කාර්යාලයේ රාජකාරි කටයුතු වල නිරත වෙමින් සිටියදී මෙම ප්‍රහාරයට ලක්ව ඇති බව ෆාර්ස් (Fars) පුවත් ඒජන්සිය සඳහන් කරයි.

මෙම ඝාතනයත් සමඟ ඉරානය පුරා දින 40ක ජාතික ශෝක කාලයක් ප්‍රකාශයට පත් කර ඇති අතර, ඉදිරි දින හත රජයේ නිවාඩු දින ලෙස නම් කර ඇත. ඉරාන විප්ලවීය ආරක්ෂක බලකාය (IRGC) ප්‍රකාශයක් නිකුත් කරමින් සඳහන් කර ඇත්තේ, තම නායකයාගේ "දිවි පිදීම" වෙනුවෙන් අනිවාර්යයෙන්ම පලිගන්නා බවයි. මේ වන විටත් ටෙහෙරාන් අගනුවර වැසියන් වීදි බැස සිය නායකයා වෙනුවෙන් ශෝකය පළ කරමින් සිටින බව වාර්තා වේ.

අමෙරිකානු ජනාධිපති ඩොනල්ඩ් ට්‍රම්ප් පවසා ඇත්තේ 'අවශ්‍ය තාක් කල්' ඉරානයට බෝම්බ හෙලීම දිගටම කරගෙන යන බවයි. අමෙරිකානු ආරක්ෂක ලේකම් පීට් හෙග්සෙත් (Pete Hegseth) ප්‍රකාශ කළේ 'ඔපරේෂන් එපික් ෆියුරි' නමින් හැඳින්වෙන මෙම මෙහෙයුම මගින් ඉරාන නාවික හමුදාව සහ මිසයිල නිෂ්පාදන මධ්‍යස්ථාන මුළුමනින්ම විනාශ කරන බවයි.

මෙම ප්‍රහාරය එක්සත් ජාතීන්ගේ ප්‍රඥප්තිය උල්ලංඝනය කිරීමක් බවත්, මෙය පාලනය කළ නොහැකි යුද්ධයක් දක්වා වර්ධනය විය හැකි බවත් එක්සත් ජාතීන්ගේ මහලේකම් ඇන්ටෝනියෝ ගුටරෙස් අනතුරු ඇඟවීය. මේ අතර, කලාපයේ පවතින උණුසුම් තත්ත්වය හේතුවෙන් ගල්ෆ් කලාපය හරහා සිදුවන නාවික ගමනාගමනය අත්හිටුවීමට ප්‍රධාන පෙළේ නැව් සමාගම් කටයුතු කර තිබේ.

අලි කමේනිගේ අභාවයෙන් පසු රටේ පාලනය මෙහෙයවීම සඳහා ජනාධිපතිවරයා, අධිකරණ ප්‍රධානියා සහ ගාඩියන් කවුන්සිලයේ සාමාජිකයෙකුගෙන් සමන්විත තිදෙනෙකුගේ කවුන්සිලයක් පත් කිරීමට නියමිත බව වාර්තා වේ.

ඇතැම් විශ්ලේෂකයින් පවසන්නේ ජාතික ආරක්ෂක කවුන්සිලයේ ප්‍රධානී අලි ලැරිජානි ඉරානයේ මීළඟ ප්‍රබල චරිතය වනු ඇති බවයි.