රෑට වොෂින් මැෂින් දාන්න එපා.. දවස් දෙක තුනක රෙදි එක පාර හෝදන්න..- ඇමති හදුන්ගෙන් විදුලිය රකින්න උපදෙස්

 

පවතින නියඟය හේතුවෙන් ජලවිදුලි උත්පාදනය අඩාල වීම නිසා, විදුලිය නිපදවීමට ඛනිජ තෙල් මත වැඩිපුර යැපීමට සිදුව ඇති බව අමාත්‍ය සුනිල් හඳුන්නෙත්ති මහතා සඳහන් කරයි. 

 මාධ්‍ය හමුවකදී අදහස් දක්වමින් ඒ මහතා අවධාරණය කළේ ගෝලීය යුද ගැටුම් නිමාවීම අවිනිශ්චිත බැවින් සහ තෙල් නිපදවන රටවල පද්ධතිවලට සිදුව ඇති හානි නිසා ඉන්ධන මිල සහනදායී මට්ටමකට පත්වීමට තවත් කල්ගත වනු ඇති බවයි.

හඳුන්නෙත්ති මහතා පවසා සිටියේ පවතින වියළි කාලගුණය හේතුවෙන් ජලාශවල ජල මට්ටම පහත බැස ඇති බැවින්, විදුලිය උත්පාදනය සඳහා ඩීසල් භාවිතය ඉහළ නැංවීමට රජයට සිදුව ඇති බවයි. 

ගෝලීය වශයෙන් පවතින යුදමය වාතාවරණය නිමාවන කාලය පිළිබඳ නිශ්චිත අනාවැකි කිව නොහැකි බවත්, එම ගැටුම් අවසන් වුවද තෙල් නිෂ්පාදනය කරන රටවල යටිතල පහසුකම්වලට සිදුව ඇති හානි හේතුවෙන් ඉන්ධන මිල ශීඝ්‍රයෙන් පහත වැටෙනු ඇතැයි අපේක්ෂා කළ නොහැකි බවත් ඒ මහතා මෙහිදී පෙන්වා දුන්නේය.

මෙම අසීරු තත්ත්වය සැලකිල්ලට ගෙන පාරිභෝගිකයන් විදුලිය භාවිතයේදී උපරිම අරපිරිමැස්මක් අනුගමනය කළ යුතු බව අවධාරණය කළ අමාත්‍යවරයා, නිවෙස්වල සහ නගරවල අනවශ්‍ය ලෙස දල්වා ඇති සියලු විදුලි පහන් නිවා දැමීමට කටයුතු කරන ලෙස ඉල්ලා සිටියේය. 

විශේෂයෙන්ම රෙදි සෝදන යන්ත්‍ර වැනි විදුලි උපකරණ භාවිත කිරීමේදී, දින කිහිපයකට අවශ්‍ය රෙදි එකවර සේදීමටත්, විදුලි ඉල්ලුම අඩු වේලාවන්හිදී එම කටයුතු සිදු කිරීමටත් ජනතාව උනන්දු විය යුතුය.

විදුලිය නිපදවීම සඳහා වැය වන ඩීසල් ප්‍රමාණය අවම කරගත හැකි වුවහොත්, එම ඉන්ධන තොග ජනතාවගේ ප්‍රවාහන අවශ්‍යතා සපුරා ගැනීම සඳහා යෙදවීමට වැඩි අවස්ථාවක් ලැබෙන බවද අමාත්‍යවරයා වැඩිදුරටත් ප්‍රකාශ කළේය.