ලෙබනනයේ හිස්බුල්ලා සංවිධානය ඉලක්ක කරගනිමින් ඊශ්රායලය එල්ල කළ දැවැන්ත ප්රහාර හේතුවෙන්, එළඹෙන සෙනසුරාදා අමෙරිකාව සමඟ පැවැත්වීමට නියමිතව තිබූ සාම සාකච්ඡා අර්ථ විරහිත වී ඇති බව ඉරානය නිවේදනය කරයි.
ලෙබනනයට එල්ල වූ මෙම ප්රහාර හරහා සටන් විරාම ගිවිසුම උල්ලංඝනය වී ඇති බවත්, එමඟින් සාකච්ඡා මාර්ගයෙන් විසඳුම් සෙවීමේ අවස්ථාව අවහිර වී ඇති බවත් ඉරාන ජනාධිපති මසූඩ් පෙසෙෂ්කියන් ප්රකාශ කළේය.
පසුගිය බදාදා ලෙබනනය පුරා ඊශ්රායලය එල්ල කළ පෙර නොවූ විරූ ප්රහාර මාලාවකින් පුද්ගලයන් 200කට වැඩි පිරිසක් ජීවිතක්ෂයට පත්ව ඇත. ඊශ්රායලය සහ අමෙරිකාව පවසන්නේ ප්රකාශයට පත් කරන ලද සති දෙකක සටන් විරාමය ලෙබනනයට අදාළ නොවන බවයි.
කෙසේ වෙතත්, ඉරාන පාර්ලිමේන්තු කථානායක මොහොමඩ් බගර් ගලිබාෆ් අවධාරණය කළේ ලෙබනනය ඇතුළු සමස්ත ප්රතිරෝධී අක්ෂය මෙම සටන් විරාමයේ වෙන් කළ නොහැකි කොටසක් බවයි.
මෙම තත්ත්වය හමුවේ ඉරානය විසින් පනවා ඇති හෝමුස් සමුද්ර සන්ධියේ අවහිරතා ඉවත් කිරීමට ද මෙතෙක් පියවර ගෙන නොමැත.
සාමාන්යයෙන් දිනකට යාත්රා 140ක් පමණ ගමන් කරන මෙම කලාපයෙන් පසුගිය දිනයේ ගමන් කර ඇත්තේ යාත්රා හයක් වැනි සුළු සංඛ්යාවක් බව නාවික දත්ත වාර්තා කරයි.
පාකිස්තාන අග්රාමාත්ය ෂෙහ්බාස් ෂරීෆ්ගේ සහ හමුදාපති අසීම් මුනීර්ගේ මැදිහත් වීමෙන් ඉස්ලාමාබාද් නුවරදී මෙම සාකච්ඡා පැවැත්වීමට සැලසුම් කර තිබුණි. ලෙබනන අග්රාමාත්ය නවාෆ් සලාම් ද පාකිස්තානයෙන් ඉල්ලා සිටියේ සටන් විරාමය සඳහා ලෙබනනය ද ඇතුළත් කර ගැනීමට මැදිහත් වන ලෙසයි.
මේ අතර, අමෙරිකානු ජනාධිපති ඩොනල්ඩ් ට්රම්ප් විසින් ඊශ්රායල අග්රාමාත්ය බෙන්ජමින් නෙතන්යාහු වෙත දුරකථන ඇමතුමක් ලබා දෙමින්, සටන් විරාමය බිඳ වැටීම වැළැක්වීම සඳහා ලෙබනනයට එල්ල කරන ප්රහාර සීමා කරන ලෙස දන්වා ඇති බව වාර්තා වේ.
ඉරාන න්යෂ්ටික බලශක්ති ඒජන්සියේ ප්රධානී මොහොමඩ් එස්ලාමි ප්රකාශ කළේ තම රටේ යුරේනියම් සාරවත් කිරීමේ වැඩපිළිවෙළට කිසිදු සීමාවක් පැනවීමට ඉඩ නොදෙන බවයි.
හෝමුස් සමුද්ර සන්ධිය හරහා ගමන් කරන නෞකාවලින් ගාස්තුවක් අය කිරීමට ඉරානය සහ අමෙරිකාව යෝජනා කර ඇතත්, යුරෝපා සංගමය ඊට දැඩි විරෝධය පළ කරමින් පවසන්නේ නාවික නිදහස ජාත්යන්තර නීතිය යටතේ සුරක්ෂිත විය යුතු බවයි.
ලෝක තෙල් සැපයුමෙන් 20%ක් පමණ ප්රවාහනය කෙරෙන හෝමුස් සමුද්ර සන්ධිය වසා දැමීම හේතුවෙන් ලෝක වෙළඳපොළේ බලශක්ති මිල ඉහළ ගොස් ඇති අතර ආහාර සුරක්ෂිතතාව පිළිබඳ දැඩි අවදානමක් ද මතු වී තිබේ
