භාණ්ඩාගාර කොල්ලය : ජනපතිට මුදල් ඇමතිකමෙන්, හර්ෂණට මුදල් ලේකම් කමෙන් ඉවත් වන්නැයි යෝජනාවක්..

මහා භාණ්ඩාගාරයෙන් ඩොලර් මිලියන 2.5ත් 5ත් අතර මුදලක් අතුරුදන් වීම සම්බන්ධයෙන් කිසිදු හැකර්වරයෙකුගේ සම්බන්ධයක් නොමැති බවත්, එය ආයතනය තුළම සිදුවූ බරපතල ක්‍රියාවක් බවත් 'දිනන දකුණ' සංවිධානයේ ශිරාල් ලක්තිලක මහතා පවසයි.

මාධ්‍ය හමුවක් අමතමින් ඒ මහතා අවධාරණය කළේ මෙය තාක්ෂණිකව 'බිස්නස් මේල් කොම්ප්‍රොමයිස්' (Business Email Compromise) හෙවත් 'ෆිෂිං' (Phishing) ක්‍රියාවලියක් හරහා සිදුවූවක් බවයි.

ලක්තිලක මහතා පෙන්වා දෙන්නේ මහා භාණ්ඩාගාරයේ නිලධාරීන් ව්‍යාජ ඊමේල් පණිවිඩයක් (Phishing) විශ්වාස කර මෙම මුදල් යවා ඇති බවයි.

එහිදී අදාළ විදේශීය බැංකුවේ ප්‍රධානීන් සමග නිසි ලෙස සන්නිවේදනය නොකර, ලැබුණු ව්‍යාජ ඊමේලයේ සඳහන් දුරකථන අංකයකට ඇමතුමක් ලබා දී තොරතුරු තහවුරු කරගෙන මුදල් බැර කර ඇති බව ඔහු හෙළි කළේය.

මෙය හුදු නොසැලකිලිමත්කමක් නොව, මහා බැංකුවේ අනතුරු ඇඟවීම් පවා නොසලකා හරිමින් සිදුකළ 'සාපරාධී නොසැලකිල්ලක්' බව ඔහුගේ චෝදනාවයි.

මෙම සිද්ධිය මාස තුනකට පෙර සිදුවූවක් බව මුදල් අමාත්‍යාංශ ලේකම්වරයා සහ රාජ්‍ය අමාත්‍යවරයා පවසන නමුත්, කැබිනට් ප්‍රකාශකවරයා ඒ පිළිබඳව දැනුවත් වී ඇත්තේ ඊයේ දිනයේදී බව ලක්තිලක මහතා පෙන්වා දෙයි. 

රටේ පාලන මර්මස්ථානය වන කැබිනට් මණ්ඩලය මෙවැනි බරපතල සිදුවීමක් පිළිබඳව නොදැන සිටීම පුදුම සහගත බවත්, මින් රජයේ පාලනයේ පවතින දුර්වලතාවය මනාව පැහැදිලි වන බවත් ඔහු පැවසීය.

පාර්ලිමේන්තුවට හෝ කැබිනට් මණ්ඩලයට මේ පිළිබඳව වාර්තා නොකිරීම හරහා තොරතුරු වසන් කිරීමක් සිදුව ඇති බවට ඔහු චෝදනා කරයි.

සිද්ධිය සම්බන්ධයෙන් පහළ මට්ටමේ විධායක නිලධාරීන්ගේ වැඩ තහනම් කිරීම ප්‍රමාණවත් නොවන බවත්, මහා භාණ්ඩාගාරයේ ප්‍රධානියා ලෙස මුදල් අමාත්‍යාංශ ලේකම්වරයා මෙහි වගකීම භාරගෙන වහාම ඉල්ලා අස්විය යුතු බවත් ලක්තිලක මහතා අවධාරණය කළේය.

පරීක්ෂණ මගින් කරුණු තහවුරු වුවහොත් මුදල් අමාත්‍යවරයාද ඉල්ලා අස්විය යුතු බව ඔහු වැඩිදුරටත් කියා සිටියේය.

මෙම සිද්ධිය යහපාලන ආණ්ඩුවේ මහ බැංකු බැඳුම්කර වංචාවට සමාන කරමින් ඔහු ප්‍රකාශ කළේ, "යහපාලන ආණ්ඩුව මහ බැංකුව කැඩුවේ යම් සේද, මාලිමා ආණ්ඩුව මහා භාණ්ඩාගාරය කඩා ඇති" බවයි. 

මෙය කිසිසේත්ම සුළුවෙන් තකා යට ගැසිය නොහැකි බරපතල රාජ්‍ය නොසැලකිල්ලක් බව ඔහු අවසන් වශයෙන් සඳහන් කළේය