ඉරාන යුද්දය මැද ට‍්‍රම්ප් පරිපාලනයේ කැළඹීම්.. නීතිපති හා යුද හමුදාපති ධුරයෙන් ඉවත් කෙරේ..

 

ඇමරිකානු ජනාධිපති ඩොනල්ඩ් ට්‍රම්ප් විසින් සිය පරිපාලනයේ තීරණාත්මක තනතුරු දෙකක වෙනසක් සිදු කරමින්, එරට නීතිපති පැම් බොන්ඩි (Pam Bondi) සහ යුද හමුදාපති ජෙනරාල් රැන්ඩි ජෝර්ජ් (Gen Randy George) වහාම ක්‍රියාත්මක වන පරිදි එම ධුරවලින් ඉවත් කර තිබේ.

ජනාධිපති ට්‍රම්ප්ගේ සමීපතම මිතුරියක සහ දැඩි ආරක්ෂිකාවක ලෙස සැලකෙන පැම් බොන්ඩි නීතිපති ධුරයෙන් ඉවත් කළ බව ට්‍රම්ප් සිය 'ටෘත් සෝෂල්' ගිණුම හරහා තහවුරු කළේය.

ඇය පෞද්ගලික අංශයේ වෘත්තීය භූමිකාවකට පිවිසෙන බව ජනාධිපතිවරයා ප්‍රකාශ කළද, විවාදාත්මක ජෙෆ්රි එප්ස්ටයින් (Jeffrey Epstein) නඩු ගොනු සම්බන්ධයෙන් ඇය කටයුතු කළ ආකාරය පිළිබඳ ජනාධිපතිවරයා කලකිරීමෙන් පසුවූ බව වාර්තා වේ.

එප්ස්ටයින් නඩුවට අදාළ ලිපිගොනු ප්‍රසිද්ධ කරන බවට ඇය මීට පෙර පොරොන්දු වුවද, පසුව එවැනි නාමලේඛනයක් නොමැති බව අධිකරණ දෙපාර්තමේන්තුව ප්‍රකාශ කිරීමත් සමඟ ඇය ද්විපාර්ශ්වික දෝෂදර්ශනයට ලක්විය.

ඇයගේ අනුප්‍රාප්තිකයා ලෙස හිටපු නියෝජ්‍ය නීතිපති ටොඩ් බ්ලැන්ච් පත් කර ඇති අතර, පැම් බොන්ඩි මාර්තු මාසයේදී ඉවත් කළ ක්‍රිස්ටි නොයෙම්ට පසුව මෑත සති කිහිපය තුළ ධුරයෙන් ඉවත් කළ දෙවන ඉහළ පෙළේ නිලධාරිනියයි.

මේ අතර, ඇමරිකානු ආරක්ෂක ලේකම් පීට් හෙග්සෙත් (Pete Hegseth) විසින් යුද හමුදා මාණ්ඩලික ප්‍රධානී ජෙනරාල් රැන්ඩි ජෝර්ජ්ට ධුරයෙන් ඉල්ලා අස්වන ලෙස දන්වා ඇත. වසර 2023 දී හිටපු ජනාධිපති ජෝ බයිඩන් විසින් පත් කරන ලද ජෙනරාල් ජෝර්ජ්, වසර හතරක නිල කාලය අවසන් වීමට පෙර මෙලෙස ඉවත් වීමට සිදුවී තිබේ.

පෙන්ටගනයේ ප්‍රකාශක ෂෝන් පර්නෙල් සඳහන් කළේ ජෙනරාල් ජෝර්ජ් වහාම ක්‍රියාත්මක වන පරිදි විශ්‍රාම ගන්නා බවයි. ඔහුගේ ඉවත් වීමට නිශ්චිත හේතුවක් දක්වා නොමැති වුවද, හමුදාවේ නායකත්ව වෙනසක් සඳහා කාලය එළඹ ඇති බව ජ්‍යෙෂ්ඨ ආරක්ෂක නිලධාරියෙකු ප්‍රකාශ කර ඇත. වැඩබලන යුද හමුදාපතිවරයා ලෙස ජෙනරාල් ක්‍රිස්ටෝපර් ලැනීව් පත් කර තිබේ.

ආරක්ෂක ලේකම් හෙග්සෙත් පෙන්ටගනය භාර ගැනීමෙන් පසුව මේ දක්වා නාවික මෙහෙයුම් ප්‍රධානී සහ ගුවන් හමුදා නියෝජ්‍ය මාණ්ඩලික ප්‍රධානී ඇතුළු ජ්‍යෙෂ්ඨ හමුදා නිලධාරීන් දොළොස් දෙනෙකුට වැඩි පිරිසක් ධුරවලින් ඉවත් කර ඇත.

ඉරානය සමඟ පවතින යුද්ධය ඉක්මනින් අවසන් වන බවට ජනාධිපති ට්‍රම්ප් ප්‍රකාශ කර ඇති පසුබිමක මෙම නායකත්ව වෙනස්කම් සිදුවීම විශේෂත්වයකි.