ඩොලරයට ලොකු බලපෑමක් ඇවිල්ලා.. පිටි මිල වැඩිකරන්න වෙනවා..

ඉදිරියේදී මෙරටට ආනයනය කිරීමට නියමිත පාන්පිටි තොගවල මිල ඉහළ යා හැකි බැවින්, ඒ අනුව ඉදිරියේදී මිල සංශෝධනයක් පිළිබඳව සලකා බැලීමට සිදුවනු ඇති බව වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා පාර්ලිමේන්තුවේදී ප්‍රකාශ කළේය.

අමාත්‍යවරයා පෙන්වා දුන්නේ දැනට මෙරට තුළ මාස තුනකට ප්‍රමාණවත් පාන්පිටි තොග පවතින බවත්, එම තොග සඳහා දැනට මිල වැඩි කිරීමක අවශ්‍යතාවයක් නොමැති බවත්ය.

කෙසේ වෙතත්, ඉදිරියේදී ඇණවුම් කර ඇති නව තොග ලැබීමේදී ඒවායේ මිල ගණන් ඉහළ යාම සහ ඩොලරයේ අගයෙහි සිදුවන වෙනස්වීම් හමුවේ මිල වැඩිවීමක් අපේක්ෂා කළ හැකි බව ඔහු වැඩිදුරටත් සඳහන් කළේය.

විපක්ෂය විසින් එල්ල කරනු ලබන චෝදනාවලට පිළිතුරු දෙමින් අමාත්‍යවරයා අවධාරණය කළේ, පවතින උත්සව සමය තුළ කිරිපිටි, කිරි ආහාර හෝ බිස්කට් වර්ගවල කිසිදු මිල වැඩි කිරීමක් සිදු නොවන බවයි.

උත්සව සමයේ ජනතාව මත පැටවෙන බර අවම කිරීම සඳහා රජය දැනටමත් ආනයනකරුවන්, කිරිපිටි, බිස්කට්, බේකරි නිෂ්පාදකයින් මෙන්ම සිමෙන්ති සහ යකඩ නිෂ්පාදකයින් සමඟ ද සාකච්ඡා පවත්වා ඇති බව ඔහු පැවසීය.

රටේ ආර්ථික තත්ත්වය පිළිබඳව අදහස් දක්වමින් අමාත්‍යවරයා කියා සිටියේ, ලෝක වෙළෙඳපොළේ තෙල් මිල ඉහළ යාම හේතුවෙන් විදේශ සංචිතවලට බිලියන 1.5ක පමණ බලපෑමක් එල්ල විය හැකි බවට ජනාධිපතිවරයා ද දැනුවත් කර ඇති බවයි.

සංචාරකයින්ගේ පැමිණීම ඉහළ මට්ටමක පැවතියද, විදේශ ප්‍රේෂණවල අඩුවීමක් සිදුවුවහොත් එය ආර්ථිකයට තවදුරටත් බලපෑම් කළ හැකි බවද හෙතෙම පෙන්වා දුන්නේය.

ජනතාව පීඩාවට පත් නොවන අයුරින් භාණ්ඩ හා සේවා සැපයීම සහතික කිරීමට රජය අඛණ්ඩව මැදිහත් වන බව අමාත්‍ය වසන්ත සමරසිංහ මහතා මෙහිදී වැඩිදුරටත් අවධාරණය කළේය