‘විදුලි ගාස්තු යලි වැඩි කරන්නද..’ මහජන මතය විමසයි..

 ලෝක වෙළෙඳපොළේ ඉන්ධන මිල ඉහළ යාම පදනම් කරගනිමින්, 2026 වසරේ දෙවැනි සහ තෙවැනි කාර්තු සඳහා විදුලි ගාස්තු සංශෝධනය කිරීමට අදාළ මහජන අදහස් විමසීමේ සැසිය අද (06) කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්වේ.  

විදුලි ජනන පිරිවැය ඉහළ යාම හේතුවෙන් ජාතික පද්ධති මෙහෙයුම් පුද්ගලික සමාගම රුපියල් බිලියන 38ක මූල්‍ය හිඟයකට මුහුණ දී සිටියි.  

මෙම හිඟය පියවා ගැනීම සඳහා විදුලි ගාස්තු 20%කට ආසන්න ප්‍රමාණයකින් ඉහළ දැමීමට එම සමාගම යෝජනා කර ඇත.  

ජාතික පද්ධති මෙහෙයුම් පුද්ගලික සමාගම විසින් මෙම සංශෝධිත පිරිවැය ඇස්තමේන්තු පසුගිය අප්‍රේල් 27 වැනිදා මහජන උපයෝගිතා කොමිසම වෙත ඉදිරිපත් කරන ලදී.  

හෙට පැවැත්වෙන වාචික සැසියේදී ලියාපදිංචි වෘත්තිකයන්ට සහ වෘත්තීය සමිති නියෝජිතයන් ඇතුළු මහජනතාවට සිය අදහස් ඉදිරිපත් කළ හැකිය. 

මීට අමතරව, තැපෑල සහ ෆැක්ස් , විද්‍යුත් තැපෑල (Email), වට්ස්ඇප් (WhatsApp) ක්‍රමවේද හරහා ද අදහස් ඉදිරිපත් කිරීමේ අවස්ථාව පවතී.    

මහජන උපයෝගිතා කොමිෂන් සභාවේ ආයතනික සන්නිවේදන අධ්‍යක්ෂ ජයනාත් හේරත් මහතා සඳහන් කරන්නේ, මහජනතාවගෙන් ලැබෙන සියලු යෝජනා සහ අදහස් සැලකිල්ලට ගෙන විදුලි ගාස්තු සම්බන්ධ අවසන් තීරණය මේ මස (මැයි) 09 වැනිදා නිල වශයෙන් ප්‍රකාශයට පත් කරන බවයි.