රණවිරු සැමරුම සේනාධිනායක ජනපති අනුරගේ ප‍්‍රධානත්වයෙන්..

දශක තුනකට අධික කාලයක් ශ්‍රී ලංකාවේ පැවති කුරිරු එල්.ටී.ටී.ඊ ත්‍රස්තවාදය යුදමය වශයෙන් පරාජය කර අද දිනට (මැයි 18) වසර 17ක් සපිරෙයි. 

ඒ වෙනුවෙන් මෙරට ස්වෛරීත්වය සහ නිදහස උදෙසා ජීවිත පරිත්‍යාග කළ වීරෝදාර රණවිරුවන්ට ජාතියේ ප්‍රණාමය පුද කෙරෙන වාර්ෂික "ජාතික රණවිරු දින සැමරුම් උත්සවය" හෙට (19) පස්වරු 3.00 ට බත්තරමුල්ල රණවිරු ස්මාරකය අභියසදී උත්කර්ෂවත් අන්දමින් පැවැත්වීමට සියලු කටයුතු ලැහැස්ති කර තිබේ.

මෙම රාජ්‍ය උත්සවය ජනාධිපති අනුර කුමාර දිසානායක මහතාගේ ප්‍රධානත්වයෙන් පැවැත්වීමට නියමිතය.

පසුගිය 14 වැනිදා රජයේ ප්‍රවෘත්ති දෙපාර්තමේන්තුවේ පැවැති මාධ්‍ය සාකච්ඡාවකට එක්වෙමින් රණවිරු සේවා අධිකාරියේ සභාපති බ්‍රිගේඩියර් එස්.බී. කොහොන මහතා සඳහන් කළේ මෙවර සැමරුම සාම්ප්‍රදායික ආකෘතියට අනුව සංවිධානය කර තිබුණද, එහි විශේෂ වෙනස්කම් කිහිපයක් සිදු කර ඇති බවයි. 

ඒ අනුව, මියගිය රණවිරුවන්ගේ පවුල්වල සාමාජිකයන්ට මෙන්ම ආබාධිත හා සේවයේ නියුතු රණවිරුවන්ට මෙවර උත්සවය සඳහා වැඩි දායකත්වයක් ලබාදීමට පියවර ගෙන ඇත. 

එමෙන්ම උතුරු සහ නැගෙනහිර පළාත් නියෝජනය කරමින් ද්‍රවිඩ හා මුස්ලිම් ජාතික රණවිරුවන් මෙන්ම ඔවුන්ගේ සමීපතම ඥාතීන් පිරිසක්ද මෙම සැමරුමට විශේෂ ආරාධිතයන් ලෙස එක්වීමට නියමිතය.

රණවිරු සේවා අධිකාරියේ අධ්‍යක්ෂ එල්.එම්.සී.බී. නිශ්ශංක මහතා උත්සවයේ සැලසුම් පිළිබඳව කරුණු දක්වමින් ප්‍රකාශ කළේ මෙවර සැමරුම සඳහා රණවිරු දෙමාපියන්, විශේෂ ආරාධිතයන් මෙන්ම යුද, නාවික, ගුවන් හමුදා, පොලිසිය, විශේෂ කාර්ය බලකාය, සිවිල් ආරක්ෂක දෙපාර්තමේන්තුව සහ ජාතික ශිෂ්‍ය භට බලකාය නියෝජනය කරමින් 2,769 දෙනෙකුගෙන් යුත් පිරිසක් සහභාගී වන බවයි.