යුරෝපීය භාණ්ඩ සඳහා බදු විශාල ලෙස ඉහළ දානවා..- ට‍්‍රම්ප්

එක්සත් ජනපදය සහ යුරෝපා සංගමය (EU) අතර ඇති කරගත් ඓතිහාසික වෙළඳ ගිවිසුම එළඹෙන ජූලි 04 වනදාට පෙර සම්පූර්ණයෙන්ම ක්‍රියාත්මක නොකළහොත්, යුරෝපීය භාණ්ඩ සඳහා පනවන බදු විශාල ලෙස ඉහළ නංවන බවට ඇමෙරිකානු ජනාධිපති ඩොනල්ඩ් ට්‍රම්ප් අනතුරු අඟවයි.

යුරෝපීය කොමිසමේ සභාපතිනී උර්සුලා වොන් ඩර් ලේයන් සමඟ පැවැත්වූ දුරකථන සාකච්ඡාවකින් අනතුරුව ට්‍රම්ප් මෙම තීරණය දැනුම් දී තිබේ. ඇමෙරිකාවේ 250 වන නිදහස් දිනය යෙදෙන ජූලි 04 වනදා දක්වා සහන කාලයක් ලබාදීමට තමන් එකඟ වූ බවත්, එදිනට පෙර පොරොන්දු වූ පරිදි බදු ඉවත් කිරීමට යුරෝපා සංගමය පියවර ගත යුතු බවත් ඔහු අවධාරණය කළේය.

පසුගිය වසරේ ස්කොට්ලන්තයේ ටර්න්බෙරි හිදී ඇති කරගත් එකඟතාවකට අනුව, ඇමෙරිකානු භාණ්ඩ සඳහා පනවා ඇති ඉතිරි බදු ඉවත් කිරීමට යුරෝපා සංගමය එකඟ වී තිබුණි. 

ඒ වෙනුවට යුරෝපීය භාණ්ඩ සඳහා වන බදු 15% ක සීමාවක පවත්වා ගැනීමට ඇමෙරිකාව එකඟ විය. කෙසේ වෙතත්, යුරෝපා සංගමය එම බදු කපා හැරීම ප්‍රමාද කිරීම හේතුවෙන් ට්‍රම්ප් පසුගියදා තර්ජනය කළේ යුරෝපීය මෝටර් රථ සඳහා වන බදු 15% සිට 25% දක්වා වහාම ඉහළ නංවන බවයි.

ගිවිසුම ක්‍රියාත්මක කිරීමට අවශ්‍ය නීති සම්පාදනය සඳහා යුරෝපා පාර්ලිමේන්තුව තුළ දැනටමත් සාකච්ඡා පැවැත්වෙමින් තිබේ. 

මෙහිදී මතු වී ඇති ප්‍රධානතම ගැටලුව වන්නේ, ට්‍රම්ප් විසින් ගිවිසුම කඩ කළහොත් හෝ ඩෙන්මාර්කයට අයත් ග්‍රීන්ලන්තය බලහත්කාරයෙන් අත්පත් කරගන්නා බවට මීට පෙර කළාක් වැනි තර්ජනයක් එල්ල කළහොත් ඊට එරෙහිව ක්‍රියා කළ හැකි ආරක්ෂිත විධිවිධාන ගිවිසුමට ඇතුළත් කිරීමට යුරෝපීය නීති සම්පාදකයන් උත්සාහ කිරීමයි.

ට්‍රම්ප් සමඟ පැවති සාකච්ඡාවෙන් අනතුරුව උර්සුලා වොන් ඩර් ලේයන් ප්‍රකාශ කළේ, ජූලි මස මුල වන විට බදු අඩු කිරීමේ ක්‍රියාවලිය සාර්ථක වනු ඇති බවට තමන් විශ්වාස කරන බවයි. "ගිවිසුමක් යනු ගිවිසුමක්" යන්න ඇය නැවතත් අවධාරණය කළාය.

වෙළඳ කරුණුවලට අමතරව නායකයන් දෙපළ මැදපෙරදිග පවතින උණුසුම් වාතාවරණය පිළිබඳව ද සාකච්ඡා කළහ. ඉරානයට කිසිසේත්ම න්‍යෂ්ටික අවියක් නිෂ්පාදනය කිරීමට ඉඩ නොදිය යුතු බවටත්, කලාපීය ස්ථාවරත්වය සුරැකිය යුතු බවටත් ඔවුහු මෙහිදී පොදු එකඟතාවකට පැමිණියහ.

ඉරානය සමඟ පවතින යුද්ධය හේතුවෙන් අමෙරිකාව තුළ තෙල් මිල ඉහළ යාම නිසා ට්‍රම්ප්ගේ ජනප්‍රියත්වය 34% දක්වා පහත වැටී ඇති බව රොයිටර් පුවත් සේවය වාර්තා කරයි.

හෝමුස් සමුද්‍ර සන්ධියේ යුද්ධය නිමා කිරීම සඳහා පාකිස්තානයේ මැදිහත්වීමෙන් දෙපාර්ශ්වය අතර තාවකාලික එකඟතාවක් පිළිබඳ සාකච්ඡා මේ වන විට සිදුවෙමින් පවතී.