ලෝක තෙල් මිල යලි ඉහලට...

 හෝමුස් සමුද්‍ර සන්ධියේදී ඇමෙරිකානු සහ ඉරාන නාවික හමුදා අතර අද (08) සිදුවූ වෙඩි හුවමාරුවක් හේතුවෙන් ලෝක වෙළඳපොළේ බොරතෙල් මිල යළිත් ඉහළ ගොස් තිබේ. 

මෙම ගැටුම හමුවේ බ්‍රෙන්ට් වර්ගයේ බොරතෙල් බැරලයක මිල 3% කින් පමණ ඉහළ ගොස් ඩොලර් 103 සීමාවට පැමිණි අතර, පසුව එය ඩොලර් 100 මට්ටම දක්වා ස්ථාවර විය.

ඇමෙරිකානු මධ්‍යම විධානය සඳහන් කළේ, සිය නෞකා පර්සියානු ගල්ෆ් කලාපයෙන් පිටතට ගමන් කරමින් සිටියදී එල්ල වූ "ප්‍රකෝපකාරී නොවන" ඉරාන ප්‍රහාරවලට ප්‍රතිචාර වශයෙන් තමන් ස්වයං-ආරක්ෂක ප්‍රහාර එල්ල කළ බවයි. ජනාධිපති ඩොනල්ඩ් ට්‍රම්ප් ප්‍රකාශ කළේ මෙම ගැටුමේදී ඇමෙරිකානු විනාශක නෞකා තුනක් සහභාගී වූ බවත්, ඉරාන කුඩා යාත්‍රා කිහිපයක් විනාශ කළ බවත්ය.

ඉරාන රාජ්‍ය මාධ්‍ය වාර්තා කරන්නේ, ඇමෙරිකාව විසින් සටන් විරාම ගිවිසුම උල්ලංඝනය කරමින් සිය තෙල් නැවක් ඇතුළු යාත්‍රා කිහිපයකට වෙරළ තීරයේදී ප්‍රහාර එල්ල කළ බවයි. 

ඊට ප්‍රතිචාර වශයෙන් තමන් එල්ල කළ ප්‍රහාරවලින් ඇමෙරිකානු නෞකාවලට දැඩි හානි සිදු වූ බව ඉරානය පැවසුවද, ඇමෙරිකානු පාර්ශවය එම හානි පිළිබඳ චෝදනා ප්‍රතික්ෂේප කර ඇත.

ගැටුම්කාරී තත්ත්වයක් පැවතියද, දෙරට අතර ඇති කරගත් සටන් විරාමය තවදුරටත් බලාත්මක බවත්, සාකච්ඡා සාර්ථකව ඉදිරියට යන බවත් ජනාධිපති ට්‍රම්ප් අවධාරණය කළේය. 

"මෙය සුළු ගැටුමක් පමණයි (Just a love tap)," යනුවෙන් ඒ පිළිබඳව අදහස් දැක්වූ ඔහු, ඉරානය කිසිසේත්ම න්‍යෂ්ටික අවියක් නිෂ්පාදනය නොකළ යුතු බවට වන ඇමෙරිකානු ස්ථාවරය නැවතත් මතක් කර දුන්නේය.

ඉරාන පාර්ශවය ද පසුව ප්‍රකාශ කළේ මේ වන විට ප්‍රදේශයේ තත්ත්වය යථා තත්ත්වයට පත්ව ඇති බවයි.

පෙබරවාරි 28 වනදා යුද්ධය ආරම්භ වීමට පෙර ඩොලර් 70 මට්ටමේ පැවති බොරතෙල් මිල, හෝමුස් සමුද්‍ර සන්ධිය වසා දැමීමත් සමඟ දැඩි ලෙස ඉහළ ගියේය. 

දැනට පවතින සටන් විරාමය අතිශය "බිඳෙන සුළු" එකක් බව ආර්ථික විශ්ලේෂකයන් පෙන්වා දෙන අතර, වෙළඳපොළ මිල ගණන් උච්චාවචනය වීමට එම අවිනිශ්චිතභාවය සෘජුවම බලපා ඇත.

පවතින රාජ්‍යතාන්ත්‍රික මට්ටමේ සාකච්ඡා හරහා දින 30 ක කාලයක් තුළ ස්ථිර සාම ගිවිසුමක රාමුව සකස් කිරීමට වොෂින්ටනය දැනටමත් උත්සාහ කරමින් සිටින බව වාර්තා වේ.