සහස්පුර වැසියන්ගේ විරෝධතා සාධාරණයි.. වැරැද්ද හිටපු පාලකයන්ගේ..

 පරිදි නඩත්තු නොකිරීමට එරෙහිව සහස්පුර නිවාස සංකීර්ණයේ වැසියන් සංවිධානය කළ උද්ඝෝෂණය අතිශය සාධාරණ එකක් බව නියෝජ්‍ය ඇමති එරංග ගුණසේකර මහතා ප්‍රකාශ කරයි.

තමන්ගේ අයිතීන් සහ අවශ්‍යතාවන් දිනා ගැනීම සඳහා ජනතාව අරගල කිරීම සාමාන්‍ය ස්වභාවයක් බව පෙන්වා දෙන නියෝජ්‍ය අමාත්‍යවරයා, සහස්පුර නිවාස සංකීර්ණයේ පවතින ගැටලුව පිටුපස බරපතළ පසුබිමක් ඇති බවද අවධාරණය කළේය.

නියෝජ්‍ය අමාත්‍යවරයා පෙන්වා දෙන්නේ පාර්ශව තුනක ක්‍රියාකාරීත්වය හේතුවෙන් සහස්පුර අහිංසක වැසියන් දැඩි අපහසුතාවයට පත්ව ඇති බවයි.

නාගරික ප්‍රදේශවල ජීවත් වූ ජනතාව මෙම මහල් නිවාස වෙත ගෙනැවිත් පදිංචි කළ පසු තමන්ගේ වගකීම් අවසන් යැයි පැරණි පාලකයින් සිතූ බවත්, ජනතාවගේ සමාජයීය හෝ දෛනික ජීවිතය පිළිබඳව ඔවුන් කිසිදු අවධානයක් යොමු නොකළ බවත් ඔහු පැවසීය.

මිලියන ගණන් වැය කර ඉදිකළ ව්‍යාපෘති නිසි පරිදි නඩත්තු කිරීමට හෝ ඒ පිළිබඳ වාර්තා කිරීමට අදාළ නිලධාරීන්ට වුවමනාවක් නොතිබූ බව නියෝජ්‍ය ඇමතිවරයා චෝදනා කළේය.

නිවාස සංකීර්ණයේ ජීවත් වන, මත්ද්‍රව්‍යවලට ඇබ්බැහි වූ සුළු පිරිසක් ද මෙම පොදු දේපළ නිසි පරිදි පවත්වාගෙන යාමට බාධාවක්ව සිටි බව ඔහු අනාවරණය කළේය.

මෙම තත්ත්වය හමුවේ සහස්පුර නිවාස සංකීර්ණයේ ඇති විදුලි සෝපාන (ලිෆ්ට්) 6න් 3ක්ම වසර තුනක පමණ කාලයක සිට ක්‍රියාවිරහිත වී තිබූ අතර, මේ වසර මුල වන විට ක්‍රියාත්මක වී ඇත්තේ එක් විදුලි සෝපානයක් පමණි. ඉවසීමේ සීමාව ඉක්මවා යාම නිසා ජනතාව මෙලෙස පාරට බැස උද්ඝෝෂණය කිරීමට පෙළඹුණු බව හෙතෙම සඳහන් කළේය.

පවතින තත්ත්වයට කඩිනම් විසඳුම් ලබාදීම සඳහා දැනටමත් පියවර ගෙන ඇති බව ප්‍රකාශ කළ නියෝජ්‍ය අමාත්‍යවරයා, ඉදිරි සැලසුම් කිහිපයක් මෙසේ පැහැදිලි කළේය.

"දැනට සහස්පුර කැඩී ඇති විදුලි සෝපානයක් අලුත්වැඩියා කිරීම සඳහා රුපියල් ලක්ෂ 39ක මුදලක් අනුමත වී තිබෙනවා. රාජ්‍ය ආයතනවල පවතින නීතිමය ක්‍රමවේදයන්ට අනුව කටයුතු කරමින් ඉදිරි මාසයක් ඇතුළත එම විදුලි සෝපානය යථා තත්ත්වයට පත් කිරීමට අපිට පුළුවන්. ඒ වගේම, ජපානයෙන් අලුත්ම විදුලි සෝපානයක් ඇණවුම් කරලා තියෙන්නේ. ඒ සඳහා යම් කාලයක් ගත වෙනවා. මේ ගතවන කාලය ප්‍රශ්නයට ස්ථිර විසඳුමක් නොවන බව අපි දන්නවා, නමුත් පවතින අර්බුදයෙන් ජනතාව මුදාගැනීමට උපරිමයෙන් කටයුතු කරනවා."

මහල් නිවාස සංකීර්ණවල පවතින මෙවැනි අඩුපාඩු රැසක් නිරාකරණය කිරීම වෙනුවෙන් මේ වසරේදී "Metro Uplift" නමින් සුවිශේෂී වැඩසටහනක් ආරම්භ කර ඇති බවත්, ඒ සඳහා රුපියල් මිලියන 1160ක මුදලක් වෙන් කර ඇති බවත් නියෝජ්‍ය අමාත්‍යවරයා ප්‍රකාශ කළේය.

මේ යටතේ කොළඹ අනෙකුත් මහල් නිවාසවල පවතින අඩුපාඩු සොයා බැලීමද අඛණ්ඩව සිදුවේ. ඒ අනුව, මාලිගාවත්ත ප්‍රදේශයේ පිහිටි 'ලක් හිරු සෙවණ', 'ලක්සෙත' සහ 'සියසෙත සෙවණ' යන මහල් නිවාස සංකීර්ණ වෙතද තමන් නිලධාරීන් සමඟ ගොස් එහි පවතින ගැටලු නිරීක්ෂණය කර, ගත යුතු ඉදිරි ක්‍රියාමාර්ග පිළිබඳව සාකච්ඡා කළ බව නියෝජ්‍ය ඇමති එරංග ගුණසේකර මහතා වැඩිදුරටත් සඳහන් කළේය.