ඉරානය වටේටම පහර දෙයි.. මැදපෙරදිග මහා යුධ බියක්..

හොර්මුස් සමුද්‍ර සන්ධියේ පිහිටි ඉරාන වරායවල් සහ දූපත් ඉලක්ක කර ගනිමින් අමෙරිකා එක්සත් ජනපදය එල්ල කළ ප්‍රහාරවලට ප්‍රතිප්‍රහාර ලෙස කලාපයේ පිහිටි අමෙරිකානු යුධ කඳවුරු රැසකට දැවැන්ත මිසයිල සහ ඩ්‍රෝන ප්‍රහාර එල්ල කිරීමට ඉරාන ඉස්ලාමීය විප්ලවීය ආරක්ෂක බලකාය (IRGC) පියවර ගෙන ඇත. 

මේ හේතුවෙන් සමස්ත මැදපෙරදිග කලාපය පුරාම දැඩි යුධමය උණුසුමක් සහ තීරණාත්මක තත්ත්වයක් නිර්මාණය වී තිබේ.

ඉරාන රාජ්‍ය මාධ්‍ය මඟින් නිකුත් කරන ලද නිල නිවේදනයකට අනුව, බහරේනයේ පිහිටි අමෙරිකානු නාවික හමුදාවේ පස්වන බලඇණි මූලස්ථානය ඉලක්ක කර ගනිමින් ඩ්‍රෝන ප්‍රහාර ද, ජෝර්දානයේ අස්රැක් හි පිහිටි 'මුවෆක් සල්ටි' අමෙරිකානු ගුවන් කඳවුර ඉලක්ක කර ගනිමින් දිගුදුර විදිහන මිසයිල ප්‍රහාර ද දියත් කර ඇත. මෙම කඳවුර අමෙරිකානු F-35 ප්‍රහාරක යානා සහ අණදෙන මධ්‍යස්ථාන පවත්වාගෙන යන උපායමාර්ගිකව ඉතා වැදගත් කඳවුරකි. 

ඉරාන ආරක්ෂක බලකාය පවසන්නේ අමෙරිකානු ගුවන් සහ නාවික කඳවුරුවල පිහිටි ඉලක්ක 21 කට පමණ ප්‍රහාර එල්ල කර ඇති බවයි. තවද, තම රටට එල්ල වන ඕනෑම නව ප්‍රහාරයකට මීට වඩා දැඩි සහ තීරණාත්මක ප්‍රතිචාරයක් දැක්වීමට සූදානම් බවද ඔවුහු අනතුරු අඟවති.

අමෙරිකානු සේනාංක රඳවා සිටින කුවේටය ද තමන් වෙත ගුවන් ප්‍රහාර එල්ල වෙමින් පවතින බව තහවුරු කර ඇත. කුවේට් ආරක්ෂක අංශ ප්‍රකාශ කළේ එරට පිහිටි 'අලි අල් සලෙම්' අමෙරිකානු කඳවුර ඉලක්ක කර ගනිමින් පැමිණි සතුරු ගුවන් ඉලක්ක සහ ඩ්‍රෝන යානා තම ගුවන් ආරක්ෂක පද්ධති මඟින් සාර්ථකව වටලා විනාශ කළ බවයි. බහරේනය සහ කුවේටය පුරා මේ වන විට ගුවන් ප්‍රහාරක සීරුවෙන් තැබීමේ සිරස් නාද ක්‍රියාත්මක කර තිබේ.