කවුරු මොනවා කිවුවත් රජයට වාහන ගේනවාමයි.. සල්ලි තියෙනවා..- ජනපති

 

වත්මන් රජය සතුව ආපදා තත්ත්වයන්ට මුහුණ දීමට මෙන්ම රටේ අත්‍යවශ්‍ය සංවර්ධන කටයුතු සඳහා ද ප්‍රමාණවත් මුදල් පවතින බව ජනාධිපති අනුර කුමාර දිසානායක මහතා අවධාරණය කරයි. 

දේශීය ආදායම් දෙපාර්තමේන්තුවේ පැවැති වැඩමුළුවකදී අදහස් දක්වමින් ජනාධිපතිවරයා ප්‍රකාශ කළේ, රජයේ භාණ්ඩාගාරය සතුව මේ වන විට රුපියල් ට්‍රිලියන 1.2ක මුදල් සංචිතයක් පවතින බවයි.

ආපදා සහන සඳහා බිලියන 500ක් පවතින ආපදා තත්ත්වයට මුහුණ දීම සඳහා රුපියල් බිලියන 500ක පරිපූරක ඇස්තමේන්තුවක් සම්මත කර ඇති අතර, 2026 වසර සඳහා සකස් කළ අයවැය ලේඛනය වෙනස් නොකර මෙම මුදල් වෙන් කිරීමට රජයට හැකි වූ බව ජනාධිපතිවරයා මෙහිදී පැවසීය. 

ජාත්‍යන්තර මූල්‍ය අරමුදල සමඟ ඇති එකඟතා අනුව වියදම් සීමාවන් පැවතියද, ආපදා තත්ත්වයකදී එම සීමාවන් ඉක්මවා යාමට පවතින නීතිමය ඉඩකඩ භාවිතා කරමින් මෙම පියවර ගෙන ඇත. 

මීට අමතරව, ක්ෂණික ආධාර ලෙස ජාත්‍යන්තර මූල්‍ය අරමුදලෙන් ඩොලර් මිලියන 200ක මුදලක් ලබා ගැනීමට ද රජය සමත් වී තිබේ.

ඓතිහාසික ආදායම් වාර්තා මෙම වසර ශ්‍රී ලංකා ඉතිහාසයේ වැඩිම අපනයන ආදායම, වැඩිම සංචාරක ආදායම සහ වැඩිම විදේශ ප්‍රේෂණ ලැබුණු වසර බවට පත්වන බව ජනාධිපතිවරයා පෙන්වා දුන්නේය. විශේෂයෙන්ම දේශීය ආදායම් දෙපාර්තමේන්තුව වසර 93කට පසු වැඩිම රුපියල් ප්‍රමාණයක් උපයා ඇති අතර, රේගුව සහ සුරාබදු දෙපාර්තමේන්තුව ද ඉහළම ආදායම් වාර්තා කර ඇත. 

කවුරුන් කුමන තරාතිරමක සිටියද, බදු පැහැර හරින්නන්ට එරෙහිව දැඩිව නීතිය ක්‍රියාත්මක කරන බවද ඔහු මෙහිදී අනතුරු ඇඟවීය.

ප්‍රවාහන ක්ෂේත්‍රයේ නව පිම්මක් රජයේ සේවාවන් කාර්යක්ෂම කිරීමේ අරමුණින් නව බස් සමාගමක් ආරම්භ කිරීමට රජය සැලසුම් කර ඇති අතර, ඒ යටතේ ආසන 15ක ධාරිතාවයෙන් යුතු කුඩා බස් රථ 200ක් ආනයනය කිරීමට නියමිතය. එසේම වසර 15-20ක් පැරණි වී ඇති රාජ්‍ය අංශයේ වාහන පද්ධතිය ද අලුත් කිරීමට තීරණය කර ඇත.

ආපදා සහන සඳහා වෙන් කරන මුදල් වාහන ආනයනයෙන් ලබා ගන්නා ලෙස ඇතැමුන් කළ යෝජනා ප්‍රතික්ෂේප කළ ජනාධිපතිවරයා, "වාහන ගේන්නත් සල්ලි තියෙනවා, ආපදා වැඩවලටත් සල්ලි තියෙනවා" යනුවෙන් පවසමින් අවධාරණය කළේ ආර්ථිකය ස්ථාවර මට්ටමක පවතින බැවින් එම කටයුතු දෙකම සමගාමීව කරගෙන යා හැකි බවයි