පවතින උග්ර ආර්ථික අර්බුදය හමුවේ ඉරානය පුරා ව්යාප්ත වී ඇති මහජන විරෝධතා මර්දනය කිරීමේ අරමුණින් එරට අන්තර්ජාල සබඳතා සම්පූර්ණයෙන්ම විසන්ධි කිරීමට බලධාරීන් පියවර ගෙන තිබේ.
රජයට එරෙහිව දියත් වන මහජන උද්ඝෝෂණ ඊයේ (08) දින රාත්රියේදී දැඩි ප්රචණ්ඩකාරී තත්ත්වයකට පරිවර්තනය වී තිබේ. එහිදී විරෝධතාකරුවන් විසින් එරට පාලන අධිකාරිය නියෝජනය කරන ප්රධාන ස්ථාන කිහිපයකටම අලාභහානි සිදුකර ඇති බව වාර්තා වේ.
විදෙස් පුවත් සේවාවලට අනුව, උද්ඝෝෂණයේ නිරත පිරිස් විසින් ඉස්ෆාහන් නුවර පිහිටි රජයේ ගුවන් විදුලි හා රූපවාහිනී ප්රචාරණ මධ්යස්ථානය ගිනිබත් කර ඇත.
මීට අමතරව, ටෙහෙරාන් අගනුවර ප්රදර්ශනය කර තිබූ රජය හිතවාදී පුවරු සහ බැනර් රැසක්ද විරෝධතාකරුවන්ගේ ගිනි තැබීම්වලට ලක්ව තිබේ.
ගත වූ දින 12 ක කාලය පුරා ක්රමයෙන් වර්ධනය වූ මෙම විරෝධතා ව්යාපාරය මේ වන විට ඉරානයේ පළාත් 31 ම ආවරණය වන පරිදි ව්යාප්ත වී ඇත.
ඉරාන මානව හිමිකම් සංවිධානය (IHR) සඳහන් කරන්නේ විරෝධතා ආරම්භ වූ දා සිට මේ දක්වා ආරක්ෂක අංශ එල්ල කළ ප්රහාරවලින් ළමුන් අට දෙනෙකු ඇතුළුව අවම වශයෙන් පුද්ගලයින් 45 දෙනෙකු මියගොස් ඇති බවයි.
පසුගිය බදාදා දිනය විරෝධතාවල දරුණුතම දිනය ලෙස සටහන් වූ අතර එදින පමණක් විරෝධතාකරුවන් 13 දෙනෙකු ජීවිතක්ෂයට පත්ව තිබේ.
මීට අමතරව සිය ගණනක් තුවාල ලබා ඇති අතර 2,000 කට අධික පිරිසක් අත්අඩංගුවට ගෙන ඇති බව වාර්තා වේ. ආරක්ෂක අංශ සාමාජිකයින් ද ඇතුළුව මියගිය මුළු සංඛ්යාව 21ක් බව රජයේ නිල ප්රකාශ උපුටා දක්වමින් ප්රංශ පුවත් ඒජන්සිය වාර්තා කරයි.
ඉරාන රියාලයේ අගය සීඝ්රයෙන් පහත වැටීම සහ අත්යවශ්ය භාණ්ඩ මිල ඉහළ යාම මෙම විරෝධතාවලට ප්රධානතම හේතුව වී තිබේ. පසුගිය වසරට සාපේක්ෂව ආහාර ද්රව්යවල මිල 70% කින් ද, ඖෂධ මිල 50% කින් ද ඉහළ ගොස් ඇත.
රජය විසින් ආනයනකරුවන්ට ලබා දුන් සහනදායී විනිමය අනුපාත ඉවත් කිරීමට ගත් තීරණයත් සමඟ සාමාන්ය ජන ජීවිතය තවදුරටත් දැරිය නොහැකි මට්ටමට පත්ව ඇත.
එහෙත් ඉරාන රජය පවසන්නේ මෙම අර්බුදයට ප්රධාන වශයෙන් බටහිර රටවල් පනවා ඇති සම්බාධක හේතු වී ඇති බවයි.
විරෝධතා සහ වැඩ වර්ජන කුර්දි දේශපාලන කණ්ඩායම් විසින් කරන ලද කැඳවීමකට අනුව බ්රහස්පතින්දා දිනයේදී ඉරානයේ නගර රැසක වෙළඳසැල් වසා දමමින් මහා වැඩ වර්ජනයක් දියත් විය.
දකුණු දිග ෆාර්ස් පළාතේදී විරෝධතාකරුවන් විසින් හිටපු හමුදා ප්රධානී කාසෙම් සුලෙයිමානිගේ පිළිමයක් පෙරළා දමන අයුරු දැක්වෙන වීඩියෝ දර්ශන ද සමාජ මාධ්ය වෙත මුදාහැර තිබුණි.
ඉරාන ජනාධිපති මසූඩ් පෙසෙෂ්කියන් (Masoud Pezeshkian) ප්රචණ්ඩ ක්රියාවලින් වැළකී ජනතාවගේ ඉල්ලීම්වලට සවන් දිය යුතු බවට ප්රකාශයක් කර තිබුණද, භූමියේ පවතින තත්ත්වය ඊට වඩා වෙනස් බව වාර්තා වේ.
මේ අතර, ඇමරිකානු ජනාධිපති ඩොනල්ඩ් ට්රම්ප් අනතුරු අඟවා ඇත්තේ ඉරානය දිගින් දිගටම විරෝධතාකරුවන් ඝාතනය කරන්නේ නම් ඊට දැඩි ප්රතිචාර දැක්වීමට තමන් සූදානම් බවයි.
ජර්මනිය ද ඉරාන බලධාරීන්ගේ මෙම "අධික බලය භාවිතා කිරීම" දැඩි ලෙස හෙළා දකින බව ප්රකාශ කර ඇත.
විරෝධතාකරුවන් විදේශීය බලවේගවල අතකොළු බවට ඉරාන රජය චෝදනා කරන අතර, වත්මන් විරෝධතා මාලාව 2022 වසරේ පැවති 'කාන්තාව, ජීවිතය, නිදහස' විරෝධතාවලින් පසුව එරට පාලනයට එල්ල වූ දැවැන්තම අභියෝගය ලෙස සැලකේ.
