කම්කරැ අමාත්‍යංශයේ LGBTQ කාඩ් බෙදිල්ලක්..

සේවා ස්ථානයන්හි සිදුවන ප්‍රචණ්ඩත්වය සහ හිරිහැර වැළැක්වීම සඳහා ජාත්‍යන්තර කම්කරු සංවිධානයේ (ILO) අංක 190 (C190) දරන සම්මුතිය අපරානුමත කිරීමට රජය පියවර ගනිමින් සිටින පසුබිමක, ඒ හරහා සූක්ෂම ලෙස LGBTQ මතවාද ප්‍රවර්ධනය කිරීමට උත්සාහ කරන බවට විවිධ පාර්ශ්වයන්ගෙන් චෝදනා එල්ල වෙමින් පවතින්නේ යයි Daily Mirror පුවත්පත වාර්තා කර ඇත.

කම්කරු ප්‍රතිසංස්කරණවල මුවාවෙන් සමලිංගික සහ සංක්‍රාන්ති ලිංගික (LGBTQ) ප්‍රජාවට අදාළ මතවාද සමාජගත කිරීමට රජය මෙලෙස උත්සාහ දරන බව විචාරකයෝ පෙන්වා දෙති. C190 සම්මුතියේ මූලික අරමුණ සේවක ආරක්ෂාව තහවුරු කිරීම වුවද, ඊට සමගාමීව ක්‍රියාත්මක කෙරෙන ඇතැම් දැනුවත් කිරීමේ වැඩසටහන් හරහා පාර්ලිමේන්තුවේ හෝ මහජනතාවගේ විවෘත සාකච්ඡාවට ලක් නොවූ සමාජ මතවාද ප්‍රචර්ධනය වන බව ආගමික, දේශපාලන සහ සිවිල් සංවිධාන පෙන්වා දෙයි.

සෙල්ලම් කාඩ්පත් කට්ටලය පිළිබඳ මතභේදය මෙම මතභේදාත්මක තත්ත්වය වඩාත් තීව්‍ර වූයේ පසුගිය ජනවාරි 9 වැනිදා කම්කරු අමාත්‍යාංශ ශ්‍රවණාගාරයේදී කම්කරු නියෝජ්‍ය අමාත්‍ය මහින්ද ජයසිංහ මහතාගේ ප්‍රධානත්වයෙන් පැවැති වැඩමුළුවකදීය. එහිදී සහභාගිවන්නන් වෙත ලබා දුන් සෙල්ලම් කාඩ්පත් (Playing Cards) කට්ටලයක් පිළිබඳව නියෝජිතයන්ගේ දැඩි අවධානය යොමුව තිබේ.

සාමාන්‍යයෙන් කාඩ්පත් 52කින් සමන්විත කට්ටලයක් වෙනුවට, මෙහි ඇතුළත් කර තිබූ ඇතැම් කාඩ්පත්වල විවිධ චිත්‍ර සහ කාටූන් ඇසුරින් විශේෂිත මතවාද ප්‍රවර්ධනය කරන පණිවිඩ ඇතුළත් කර තිබූ බව වාර්තා වේ.

වෘත්තීය සමිති නායකයෙකුගේ හෙළිදරව්ව මේ පිළිබඳව අදහස් දැක්වූ වැඩමුළුවට සහභාගී වූ වෘත්තීය සමිති නායකයෙකු (Daily Mirror පුවත්පත වෙත නම හෙළි නොකිරීමේ කොන්දේසිය මත) ප්‍රකාශ කර ඇත්තේ, කම්කරු අයිතිවාසිකම්වලට මුවා වී LGBTQ පිළිගැනීම ප්‍රවර්ධනය කිරීමේ "සැඟවුණු උත්සාහයක්" මෙම ද්‍රව්‍ය හරහා පෙන්නුම් කරන බවයි.

ඇතැම් පටු න්‍යාය පත්‍ර ක්‍රියාවට නංවන වෘත්තීය සමිති පමණක් මෙම වැඩසටහනට කැඳවා තිබූ බවත්, එහි අන්තර්ගතය සේවා ස්ථාන ආරක්ෂාව ඉක්මවා ගිය සංවේදී සමාජ කරුණු දක්වා විහිදී තිබූ බවත් ඔහු වැඩිදුරටත් පැවසීය.

මෙම කාඩ්පත් කට්ටලය ශ්‍රී ලංකා ජාතික නාවිකයන්ගේ සංගමය (NUSS) විසින් බෙදා දී ඇති අතර, එහි ඇසුරුමේ “මෙම කාඩ්පත් කට්ටලය සේවා ස්ථානයේ ප්‍රචණ්ඩත්වය සහ හිරිහැර අවසන් කිරීමට උපකාරී වනු ඇත” යනුවෙන් සඳහන්ව ඇත. ලන්දේසි වෘත්තීය සමිති සම්මේලනයක් වන FNV සහ එහි අන්තර්ජාතික අංශය වන Mondiaal FNV මෙම ප්‍රචාරණ ව්‍යාපෘතිය සඳහා සහය දක්වයි.

විශේෂයෙන්ම, 'Hearts 9' කාඩ්පත ඇතුළු තවත් කාඩ්පත් කිහිපයක LGBTQ ප්‍රජාව C190 සම්මුතිය යටතේ ආරක්ෂා කර ඇති බව දැක්වෙන රූප සටහන් ඇතුළත් කර තිබීම විවේචනයට ලක්ව ඇත.

සිවිල් සංවිධාන නියෝජිතයන් පවසන්නේ, ජාත්‍යන්තර කම්කරු නීති උපයෝගී කර ගනිමින් පුළුල් සමාජීය වෙනස්කම් සිදු කිරීමට උත්සාහ කිරීම මගින් පාර්ලිමේන්තු අධීක්ෂණය සහ විවෘත මහජන කතිකාව මඟහැර ඇති බවයි.

ශ්‍රී ලංකාවේ පවතින නීතිමය පසුබිම තුළ සමලිංගික සබඳතා තවමත් නීතිවිරෝධී මට්ටමක පවතින අතර, මෙවැනි ප්‍රතිසංස්කරණ සැබවින්ම කම්කරු සුබසාධනය සඳහාම පමණක් ද නැතහොත් වෙනත් සමාජ ප්‍රතිසංස්කරණ සැලසුමක කොටසක් ද යන්න රජය පැහැදිලි කළ යුතු බව විචාරකයෝ අවධාරණය කරති.

ජිනීවා නුවර පැවැති 108 වැනි ජාත්‍යන්තර කම්කරු සමුළුවේදී සම්මත කරගත් C190 සම්මුතිය, රාජ්‍ය සහ පෞද්ගලික යන අංශ දෙකෙහිම සේවකයන්ට අදාළ වන අතර, එය "සේවා ලෝකය" (World of Work) යන්නට ඉතා පුළුල් අර්ථකථනයක් ලබා දී ඇත.