10% බද්දට දවසක් යන්න පෙර ට‍්‍රම්ගෙන් ලෝකයටම අලුත් බද්දක්..

 

අමෙරිකානු ජනාධිපති ඩොනල්ඩ් ට්‍රම්ප් විසින් අලුතින් හඳුන්වා දුන් 10%ක ගෝලීය ආනයන බද්ද, එය ප්‍රකාශයට පත් කර දිනක් ගතවීමටත් පෙර 15% දක්වා ඉහළ නැංවීමට පියවර ගෙන ඇත. 

සිය සමාජ මාධ්‍ය ගිණුමක සටහනක් තබමින් ජනාධිපතිවරයා මේ බව නිවේදනය කළේය.

පසුගිය සිකුරාදා අමෙරිකානු ශ්‍රේෂ්ඨාධිකරණය විසින් ජනාධිපති ට්‍රම්ප් විසින් මීට පෙර පනවා තිබූ දැඩි බදු ප්‍රතිපත්ති බොහොමයක් අවලංගු කිරීමට තීරණය කරන ලදී. 

විනිසුරුවරුන් 6-3ක් ලෙස ලබා දුන් මෙම තීන්දුව මගින් ප්‍රකාශ වූයේ 1977 ජාත්‍යන්තර හදිසි ආර්ථික බලතල පනත (IEEPA) යටතේ එවැනි දැඩි බදු පැනවීම් සිදු කිරීමට ජනාධිපතිවරයාට අවසර නොමැති බවයි.

කෙසේ වෙතත්, මෙම අධිකරණ තීන්දුවෙන් පසුව ජනාධිපතිවරයා මුලින් 10%ක ගෝලීය බද්දක් පැනවූ අතර, පැය 24ක් ගතවීමටත් පෙර එය උපරිම මට්ටම වන 15% දක්වා වැඩි කරන බව ඔහු ප්‍රකාශ කළේය.

ශ්‍රේෂ්ඨාධිකරණ තීන්දුව මගින් මෝටර් රථ, වාහන උපාංග සහ අර්ධ සන්නායක චිප්ස් (semiconductor chips) වැනි විශේෂිත අංශ සඳහා පනවා තිබූ බදු වලට බලපෑමක් එල්ල නොවූ අතර ඒවා එලෙසම පවතිනු ඇත. 

නමුත් අනෙකුත් සියලුම විදේශීය වෙළඳ හවුල්කරුවන්ගෙන් ගෙන්වන භාණ්ඩ සඳහා මෙම නව 15%ක බද්ද වහාම ක්‍රියාත්මක වන පරිදි අදාළ වේ.

සිය තීරණය සාධාරණීකරණය කරමින් ජනාධිපති ට්‍රම්ප් සඳහන් කළේ දශක ගණනාවක් තිස්සේ ලෝකයේ බොහෝ රටවල් අමෙරිකාව සූරාකමින් සිටින බවයි. 

තමා බලයට පත්වන තෙක් කිසිදු පාලකයෙකු මෙයට එරෙහිව පියවර නොගත් බවත්, මෙම නව බදු පැනවීම හරහා අමෙරිකානු ආර්ථිකය සුරක්ෂිත කරන බවත් ඔහු වැඩිදුරටත් කියා සිටියේය