ජනාධිපති හෙලිකොප්ටර දෙකක් සමග මහනුවරට..?

 

ජනාධිපති අනුර කුමාර දිසානායක මහතා පසුගියදා මහනුවර සංචාරය සඳහා හෙලිකොප්ටර් යානා භාවිතා කිරීම සම්බන්ධයෙන් විපක්ෂය පාර්ලිමේන්තුවේදී අදහස් පළ කළේය. 

ජනාධිපතිවරයා අතීතයේදී දැක්වූ අදහස්වලට පටහැනිව මෙම ක්‍රියාව සිදුව ඇති බව විපක්ෂ මන්ත්‍රීවරු මෙහිදී පෙන්වා දුන්හ.

විපක්ෂ මන්ත්‍රී හෙක්ටර් අප්පුහාමි මහතා අදහස් දක්වමින් කියා සිටියේ, රාජ්‍ය නායකයෙකු ලෙස හෙලිකොප්ටර් යානා භාවිතා කිරීම උචිත බවත්, ජනාධිපතිවරයා හෙලිකොප්ටර් යානා දෙකක් සහිතව ගමන් කිරීම දැකීම සතුටට කරුණක් බවත්ය.

"අතීතයේදී හෙලිකොප්ටර් යානා දෙකක් භාවිතා කිරීම ගැන ප්‍රශ්න කළේ අනුර කුමාර දිසානායක මහත්මයමයි. අහසේ ගමන් කරන අතරතුර ජනාධිපතිවරයෙකුට එක යානයක සිට අනෙක් යානයට පැනිය හැකිදැයි එදා ඔහු උපහාසයෙන් ප්‍රශ්න කළා," යනුවෙන් මන්ත්‍රීවරයා සිහිපත් කළේය.

තමන් හෙලිකොප්ටර් භාවිතා නොකරන බවට මීට පෙර ප්‍රකාශ කර තිබුණද, අවසානයේ ජනාධිපතිවරයාට එම පහසුකම් භාවිතා කිරීමට සිදුව ඇති බවද ඔහු වැඩිදුරටත් සඳහන් කළේය.

මේ පිළිබඳව අදහස් දැක්වූ විපක්ෂ මන්ත්‍රී චාමර සම්පත් දසනායක මහතා ප්‍රකාශ කළේ, රාජ්‍ය නායකයෙකුගේ ආරක්ෂාව වෙනුවෙන් හෙලිකොප්ටර් යානා දෙකක් භාවිතා කිරීම සම්මත ආරක්ෂක පටිපාටියක් බව ජනාධිපතිවරයා විපක්ෂයේ සිටියදී නොදැන සිටි බව මෙයින් පෙනී යන බවයි.