විදුලිය භාවිතය අඩු කරන්න.. අපට රට ලොක්ඩවුන් කරන්න බෑ..- හදුන්නෙත්ති

 

රටේ ආර්ථිකය අඛණ්ඩව පවත්වාගෙන යාම සඳහා විදුලිය අරපිරිමැස්මෙන් භාවිත කරමින් සහාය ලබා දෙන ලෙස කර්මාන්ත ඇමති සුනිල් හඳුන්නෙත්ති මහතා මහජනතාවගෙන් සහ පළාත් පාලන ආයතනවලින් ඉල්ලීමක් කරයි.

ඇමතිවරයා පෙන්වා දෙන්නේ වර්තමානයේ පවතින දැඩි රශ්මිය සහිත දේශගුණික තත්ත්වය හේතුවෙන් ජලාශවල ජල මට්ටම් පහළ බැස ඇති අතර, මේ නිසා විදුලිය උත්පාදනය සඳහා වැඩි වශයෙන් ඩීසල් වැනි ඉන්ධන භාවිත කිරීමට සිදුවන බවයි. 

මේ හේතුවෙන් විදුලිය ඉතිරි කිරීම යනු සෘජුවම ඉන්ධන ඉතිරි කිරීමක් වන අතර, එමඟින් රටේ ආර්ථිකයට මෙන්ම පුද්ගලිකව තමන්ගේ වියදම් පාලනය කර ගැනීමට ද මහජනතාවට හැකියාව ලැබෙන බව ඔහු අවධාරණය කළේය.

විශේෂයෙන්ම රාත්‍රී 6 සිට 10 දක්වා වූ උපරිම විදුලි ඉල්ලුම පවතින කාලය තුළ ප්‍රධාන නගරවල සහ අතුරු නගරවල ආරක්ෂාවට බාධාවක් නොවන පරිදි අනවශ්‍ය විදුලි පහන් සහ වෙළඳ ප්‍රචාරක පුවරු සඳහා භාවිත කරන විදුලිය නිවා දමන ලෙස ඇමතිවරයා ප්‍රාදේශීය සභා මට්ටමින් සහ වෙළඳ ප්‍රජාවගෙන් ඉල්ලා සිටියි.

මහජනතාවට කළ හැකි සරල කැප කිරීම් සම්බන්ධයෙන් අදහස් දක්වමින් ඔහු සඳහන් කළේ නිවෙස්වල දැල්වෙන විදුලි පහන් සංඛ්‍යාව සීමා කිරීම සහ රෙදි සෝදන යන්ත්‍ර වැනි විදුලිය වැඩිපුර වැයවන උපකරණ භාවිත කිරීමේදී වඩාත් සැලකිලිමත් විය යුතු බවයි. 

රශ්නය වැඩි අවස්ථාවලදී වායුසමීකරණ යන්ත්‍ර (AC) හා විදුලි පංකා භාවිතය ඉහළ යාම නිසා විදුලි ඉල්ලුම ද ඉහළ යන බැවින් ඒ පිළිබඳව ද අවධානය යොමු කිරීම වැදගත් බව ඔහු පෙන්වා දුන්නේය.

කොවිඩ් සමයේ මෙන් රට ලොක්ඩවුන් කිරීමේ හැකියාවක් වර්තමානයේ නොමැති බවත්, ධීවර, සංචාරක සහ කර්මාන්ත ඇතුළු සියලු ආර්ථික ක්‍රියාවලීන් අඛණ්ඩව පවත්වාගෙන යාමට නම් මෙලෙස විදුලිය පිරිමසා ගැනීම අත්‍යවශ්‍ය කරුණක් බවත් ඇමති සුනිල් හඳුන්නෙත්ති මහතා වැඩිදුරටත් කියා සිටියේය. 

මෙය ආණ්ඩුවට පමණක් තනිව කළ හැකි දෙයක් නොවන බැවින් පුරවැසියන් ලෙස සැවොම මේ සඳහා දායක විය යුතු බව ඇමතිවරයාගේ අදහසයි