ඇමැතිලා භුක්ති විඳි වාහන, වරප්‍රසාද, දීමනා, වැටුප් කපා එම මුදල් ජනතාවගේ සුභසාධනයට දැම්මා...

 

මෙරට පැවැති දූෂිත දේශ­පා­ලන සංස්කෘ­තිය වෙනස් කර, ආද­ර්ශ­වත් දේශ­පා­ලන සංස්කෘ­ති­යක් ආරම්භ කිරී­මට වත්මන් රජ­යට හැකි වූ බව ධීවර, ජලජ හා සාගර සම්පත් ඇමැති රාම­ලිං­ගම් චන්ද්‍ර­සේ­කර් මහතා පැව­සීය.

ඒ මහතා මෙසේ පැව­සුවේ දිට්වා සුළි කුණා­ටු­වෙන් පීඩා­වට පත් ධීව­ර­යන්ට නව යාත්‍රා සහ ආම්පන්න බෙදා­දීම නිමි­ත්තෙන් හලා­වත වරායේ පැවැති උත්ස­ව­ය­කට එක්වෙ­මිනි.

‘දිට්වා’ සුළි කුණා­ටුව හේතු­වෙන් පීඩා­වට පත් ධීවර ජන­තාව නඟා සිටු­වීම සඳහා රජය විසින් ක්‍රියා­ත්මක කරනු ලබන රුපි­යල් මිලි­යන 865.79 ක දැවැන්ත සහන වැඩ­පි­ළි­වෙළ යටතේ, හලා­වත දිස්ත්‍රි­ක්කයේ ධීව­ර­යන්ට සහන පිරි­නැ­මීම මෙහිදී සිදු කෙරිණි.

ධීවර, ජලජ හා සාගර සම්පත් ඇමැති රාම­ලිං­ගම් චන්ද්‍ර­සේ­කර් මහ­තාගේ ප්‍රධා­න­ත්ව­යෙන් පැවැති මේ උත්ස­ව­යේදී, කුණා­ටු­වෙන් පූර්ණ හානි වූ යාත්‍රා 11ක් වෙනු­වෙන් සීනෝර් ආය­ත­නය නිෂ්පා­ද­නය කළ නව යාත්‍රා පිරි­නැ­මීම සංකේ­තා­ත්ම­කව ආරම්භ කළ අතර, අලු­ත්වැ­ඩියා කරන ලද යාත්‍රා 14ක් සහ නව දැල් ආම්පන්න ධීව­ර­යන් වෙත පිරි­නැ­මී­මද සිදු කෙරිණි.

මෙහිදී ඇමැ­ති­ව­රයා තව­දු­ර­ටත් අව­ධා­ර­ණය කළේ ‘දිට්වා’ කුණා­ටු­වෙන් සිදු වූ බර­ප­තළ විනා­ශ­යෙන් රට යථා තත්ත්ව­යට පත් කර­මින් සිටින මොහො­තක, වර්ත­මාන ගෝලීය අර්බු­දය ලෝක යුද්ධ­ය­කට සමාන බල­පෑ­මක් රටට එල්ල කර ඇති බවයි.

මේ සියලු අභි­යෝග මධ්‍යයේ වුවත්, අපි ජන­තාව තනි කරන්නේ නැහැ. ඇතැම් පිරිස් දේශ­පා­ලන වාසි තකා රජය විවේ­ච­නය කළත්, අපි පැරණි දූෂිත දේශ­පා­ලන සංස්කෘ­තිය වෙනස් කර තිබෙ­නවා. ඇමැ­ති­ව­රුන් ලෙස භුක්ති විඳ අධික වාහන වර­ප්‍ර­සාද, දීමනා සහ වැටුප් අපි මුළු­ම­නින්ම කප්පාදු කර­ග­නි­මින් ආද­ර්ශ­වත් දේශ­පා­ලන සංස්කෘ­ති­යක් ආරම්භ කර තිබෙ­නවා.

ඒ හරහා ඉතිරි කර­ගන්නා මුදල් ජන­තා­වගේ සුභ­සා­ධ­න­යට යොද­ව­නවා. ‘සුළි කුණා­ටු­වෙන් සහ ගෝලීය අර්බු­ද­ව­ලින් සිදු වූ විනා­ශය හමුවේ වුවත්, අපි ජන­තාව තනි කරන්නේ නැහැ, යැයි ඇමැ­ති­ව­රයා එහිදී පැව­සීය.

මේ සහන වැඩ­පි­ළි­වෙළ යටතේ පීඩා­වට පත් ඉස්සන් වගා­ක­රු­වන්ට 3% ක අවම පොලි­යක් යටතේ රුපි­යල් මිලි­යන 25ක් දක්වා ණය පහ­සු­කම් ලබා­දී­මට කට­යුතු කර ඇති බව පුත්ත­ලම දිස්ත්‍රික් පාර්ලි­මේන්තු මන්ත්‍රී අජිත් ගිහාන් මහතා මෙහිදී ප්‍රකාශ කළේය.

ධීවර අධ්‍යක්ෂ ජන­රාල් සුසන්ත කහ­වත්ත මහතා සඳ­හන් කළේ, මහා භාණ්ඩා­ගා­රය මඟින් වෙන් කළ රුපි­යල් මිලි­යන 865ක ප්‍රති­පා­දන මඟින් සීනෝර් සහ නෝර්ත් සී වැනි රජයේ ආය­තන හරහා මේ යාත්‍රා සහ ආම්පන්න ඉතා විනි­වි­ද­භා­ව­ය­කින් යුතුව ලබා­දෙන බවයි.

රන්මලී සෝම­සිරි