ගල් අගුරු මගඩිය බැදුම්කරේ වගේ හත් අට ගුණයක්ලු..

බැඳුම්කර වංචාවට වඩා හත් අට ගුණයක වංචාවක් ගල්අඟුරු සිද්ධියෙන් වී ඇතැයි හිටපු ඇමැති මහින්ද අමරවීර පැවසීය.

ඔහු මේ බව කියා සිටියේ අඟුණකොළපැලැස්සේ පිහිටි නිවෙසේදී පැවැති ජනහමුවකින් අනතුරුව මාධ්‍යවේදීන් විමසූ ප්‍රශ්නවලට පිළිතුරු දෙමිනි.

වැඩිදුරටත් අදහස් දැක්වූ හිටපු ඇමැතිවරයා මෙසේද කීවේය.

‘‘මේ රටේ ඉතිහාසයේ වුණු දැවැන්තම වංචාව ගල්අඟුරු වංචාව කියලා පැහැදිලියි. මොකද මීට පෙර සිද්ධ වුණු බැඳුම්කර සිද්ධිය අල්ලස් කොමිසමට අරන් ගිහිල්ලා එයට මැදිහත් වුණු කෙනෙක් විදියට මට පේනවා ඊට වඩා හත් අට ගුණයක වංචාවක්, දූෂණයක් ගල්අඟුරුවලින් වෙලා තියෙනවා කියලා. මොකද කාලයක් ඒක භාරව හිටිය ඇමැතිවරයා විදියට මට ලැබෙන තොරතුරු අනුව දූෂිතම ගනුදෙනුවක් වෙලා තියෙනවා. අනිවාර්යයෙන්ම ඒ බර දරන්න වෙන්නේ මේ රටේ ජනතාවට. ඉදිරියේදී විදුලි බිල වැඩිවීමක් ඇති වෙයි. ආර්ථිකයට බලපෑමක් වෙයි. කවදාවත් නොවෙන තරමට පරිසරයට බලපෑමක් වෙයි. බලාගාරවලට විශාල හානියක් වෙන මේ කටයුත්ත කිරෙන්වත් හෝදලා ගල්අඟුරු වංචාව පිරිසුදු කරගන්න බැහැ කියන එක පැහැදිලිව පේන්න තියෙනවා. රජය වගකීම බාරගෙන මේවාට සම්බන්ධ අයට අවශ්‍ය පියවර ගත්තොත් විතරක් යම් මට්ටමකට ජනතාව පිළිගනී. ආණ්ඩුවම මේ නිසා අන්ත අසරණ තත්ත්වයට පත්වෙලා. කවදාහරි මේවට වගකියන්න සිද්ධවෙයි.

දඩ ගෙවනවා කියන එක සම්පූර්ණ වැරැදි කතාවක්. පරිසරයට වෙන හානියට කොහොමද වන්දි ගෙවන්⁣නේ. බොයිලේරුවලට වුණ හානිය කොහොමද ගණනය කරන්නේ? දඩ මුදල ගණන් හදලා බැලුවත් තවත් බිලියන ගණනක තවත් මූල්‍යමය පාඩුවකුත් මේ ගනුදෙනුවෙන් වෙලා තියෙනවා.’’

සහම්පති මානගේ - තංගල්ල