ධනපති ආණ්ඩු කලේ නැතත් කම්කරු ආණ්ඩුව ලංවිමට පාංශකූලය දුන්නා..

ඊයේ මධ්‍යම රාත්‍රියෙන් ලංකා විදුලි බල මණ්ඩලය අවසන් ගමන් ගිය බවත්, සේවක අයිතිවාසිකම් හෝ වරප්‍රසාද සුරැකෙන කිසිදු නෛතික ලියවිල්ලක් හෝ එකඟතාවයකින් තොරව ආණ්ඩුව මෙම පියවර ගෙන ඇති බවත් නව විදුලි සේවක සංගමයේ ලේකම් ප‍්‍රියන්ත වික‍්‍රමසිංහ මහතා පවසයි.

1996, 2004 සහ 2022 වසරවලදී එවකට පැවති ධනපති ආණ්ඩු විදුලි බල මණ්ඩලය ඈවර කිරීමට ගත් උත්සාහයන් වැඩවර්ජන සහ මහජන අරගල හමුවේ පරාජය කිරීමට සේවකයන් සමත් වූ බව ඔහු සිහිපත් කළේය.

කෙසේ වෙතත්, සේවකයන්ගේ කරපිටින් බලයට පැමිණි බව කියන වත්මන් කම්කරු ආණ්ඩුව විසින් විදුලි බල මණ්ඩලය නම් වූ ආයතනයට අවසන් ඇණය ගසා ඇති බව ඔහු චෝදනා කරයි.

මෙහිදී තවදුරටත් අදහස් දැක්වූ ලේකම්වරයා සඳහන් කළේ, ගල්අඟුරු භාවිතය සම්බන්ධයෙන් මේ වන විට රුපියල් කෝටි 871ක දැවැන්ත පාඩුවක් හෙළිදරව් වී ඇති බවයි.

මෙම පාඩුව ලබන අප්‍රේල් මාසයේ සිට විදුලි බිල හරහා ජනතාව මත පැටවීමට නියමිත බවත්, විදුලි බිල ඉහළ යාම හමුවේ ජනතාවට එය දරාගත නොහැකි වූ විට ඔවුන් අනිවාර්යයෙන්ම පාරට බසිනු ඇති බවත් ඔහු අනතුරු ඇඟවීය.

අතීතයේ විදුලියට අත ගැසූ සෑම ආණ්ඩුවකටම ගෙදර යාමට සිදු වූ බව පෙන්වා දුන් වික‍්‍රමසිංහ මහතා, මහජන සහයෝගය ඇතිව මෙම තීරණය ආපසු හැරවීම සඳහා ගත හැකි උපරිම ක්‍රියාමාර්ග ගන්නා බව ද වැඩිදුරටත් අවධාරණය කළේය.