ඉරානයෙන් ඉශ්‍රායලයට දැවැන්ත මිසයිල ප්‍රහාර.. සාම කතා ගැන පරස්පර ප්‍රකාශ..

 

ඉරානය සහ ඉශ්‍රායලය අතර පවතින ගැටුම් සිව්වන සතියටත් එළඹෙද්දී, ඉරානය විසින් ඉශ්‍රායලයේ ටෙල් අවිව් ඇතුළු නගර සහ පර්සියානු ගල්ෆ් කලාපයේ අරාබි රටවල් ඉලක්ක කර ගනිමින් යළිත් ප්‍රබල මිසයිල ප්‍රහාර මාලාවක් එල්ල කර තිබේ. මෙම ප්‍රහාර හමුවේ ටෙල් අවිව් නුවර ජනතාව ආරක්ෂිත ස්ථාන කරා යොමු වූ අතර, එක් මිසයිලයක් නගරයේ ජනාකීර්ණ වීදියකට පතිත වීමෙන් නිවාස හා දේපළවලට දැඩි හානි සිදු විය.

පසුගිය සති හතර තුළ කලාපය පුරා පුද්ගලයන් 2,000කට වැඩි පිරිසක් මියගොස් ඇති බව වාර්තා වේ. ඉරාන රතු අඩසඳ සංගමයට අනුව, ඉශ්‍රායල සහ ඇමරිකානු ප්‍රහාරවලින් ඉරානය තුළ පුද්ගලයන් 1,200කට වැඩි පිරිසක් මියගොස් ඇත. ලෙබනනයේ මරණ සංඛ්‍යාව 1,000 ඉක්මවා ඇති අතර, ඉශ්‍රායලය තුළ පුද්ගලයන් 17 දෙනෙකු ජීවිතක්ෂයට පත්ව තිබේ. මීට අමතරව ඇමරිකානු සෙබළුන් 13 දෙනෙකු ද මියගොස් ඇති බව සඳහන් වේ.

ඉශ්‍රායල ආරක්ෂක අමාත්‍ය ඉශ්‍රායල් කැට්ස් ප්‍රකාශ කළේ, දකුණු ලෙබනනයේ ලිටානි ගඟ දක්වා සැතපුම් 20ක "ආරක්ෂක කලාපයක්" පිහිටුවීමට ඉශ්‍රායලය කටයුතු කරන බවයි. මෙය ගාසා තීරයේ රෆා සහ බයිට් හනූන් ප්‍රදේශවල ක්‍රියාත්මක කළ යුද ආකෘතියට සමාන වන අතර, හිස්බුල්ලා සංවිධානය මෙල්ල කරන තෙක් ඉශ්‍රායල හමුදා එම ප්‍රදේශයේ පාලනය නතු කර ගනු ඇත. මේ අතර, ජෙරුසලමේ ස්ථිර ඇමරිකානු තානාපති කාර්යාලයක් ඉදිකිරීම සඳහා ඉඩම් වෙන් කිරීමට ද ඉශ්‍රායල රජය අනුමැතිය ලබා දී ඇත.

ඇමරිකානු ජනාධිපති ඩොනල්ඩ් ට්‍රම්ප් ප්‍රකාශ කළේ, ඉරානය සමඟ සාම සාකච්ඡා සාර්ථක වෙමින් පවතින බවත්, ඉරානය විසින් තෙල් සහ ගෑස් සම්බන්ධ වටිනා "තෑග්ගක්" (Present) තමන් වෙත ලබා දුන් බවත්ය. මෙය හෝමුස් සමුද්‍ර සන්ධිය විවෘත කිරීම සම්බන්ධ පියවරක් බවට ඉඟි පළ විය.

කෙසේ වෙතත්, ඉරාන බලධාරීන් මෙම ප්‍රකාශ ප්‍රතික්ෂේප කරමින් කියා සිටියේ ඇමරිකානු ජනාධිපතිවරයා ලෝකය මුළා කිරීමට උත්සාහ කරන බවයි. මේ අතර පකිස්ථානය ද දෙපාර්ශවය අතර සාකච්ඡා සඳහා මැදිහත් වීමට කැමැත්ත පළ කර ඇත. සාම සාකච්ඡා ගැන කතා කළද, ට්‍රම්ප් විසින් මැදපෙරදිග කලාපය වෙත අමතරව 1,000කට වැඩි සෙබළුන් පිරිසක් යෙදවීමට අනුමැතිය ලබා දී තිබීම විශේෂත්වයකි.

පවතින යුද තත්ත්වය හේතුවෙන් ගෝලීය තෙල් මිල ඉහළ ගොස් ඇති අතර, බ්‍රෙන්ට් වර්ගයේ බොරතෙල් බැරලයක මිල ඩොලර් 100 සීමාව ඉක්මවා ඇත. ඉන්ධන මිල ඉහළ යාම හමුවේ නවසීලන්තය වැනි රටවල් අඩු ආදායම්ලාභී පවුල් සඳහා සහන දීමට තීරණය කර ඇති අතර, චීනය සහ ඕස්ට්‍රේලියාව තුළ ද ඉන්ධන අර්බුදයක් මතුවෙමින් පවතී.

ලෙබනනය විසින් ඉරාන තානාපතිවරයා සිය රටින් නෙරපා හැරීමට කටයුතු කර ඇති අතර, සමස්ත කලාපය තුළම පවතින්නේ අතිශය අවිනිශ්චිත තත්ත්වයකි.