ශ්රී ලංකාව සිය සාර්ව ආර්ථික පදනම ශක්තිමත් කරගෙන තිබුණද, පවතින මැදපෙරදිග බලශක්ති අර්බුදය හමුවේ එම ප්රගතිය යළිත් අවදානමට ලක්ව ඇති බව ජාත්යන්තර ණය ශ්රේණිගත කිරීමේ ආයතනයක් වන ෆිච් රේටින්ග්ස් පවසයි.
එම ආයතනය නිකුත් කළ නවතම වාර්තාවකට අනුව, 2025 වසරේදී 5.0% ක් ලෙස පැවති ශ්රී ලංකාවේ ආර්ථික වර්ධන වේගය 2026 වසරේදී 3.7% දක්වා පහත වැටෙනු ඇතැයි පුරෝකථනය කර තිබේ.
2025 වසරේදී පැවති තත්ත්වයෙන් පසුව, 2026 වසරේදී පාරිභෝගික මිල දර්ශකය 6% ක අගයක් දක්වා ඉහළ යනු ඇතැයි ෆිච් ආයතනය අපේක්ෂා කරයි. බලශක්ති පිරිවැය ඉහළ යාම සහ ඉන්ධන සංරක්ෂණ පියවරයන් මෙයට ප්රධාන වශයෙන් බලපානු ඇත.
ශ්රී ලංකාවේ 'CCC+' ණය ශ්රේණිගත කිරීම තවමත් ඉහළ රජයේ ණය බර සහ පොලී පිරිවැය හේතුවෙන් සීමා වී පවතින බව ද එහි සඳහන් වේ. 2024 වසරේ සිදු කළ ණය ප්රතිව්යුහගත කිරීමෙන් පසුව ද රාජ්ය ණය ප්රමාණය දළ දේශීය නිෂ්පාදිතයෙන් ඉහළ මට්ටමක පවතින අතර, එය 2027 වන විට 93% දක්වා ක්රමයෙන් අඩු වනු ඇතැයි අපේක්ෂා කෙරේ.
ශ්රී ලංකාව ශුද්ධ බලශක්ති ආනයනය කරන්නෙකු වන බැවින්, හෝමුස් සමුද්ර සන්ධිය දීර්ඝ කාලයක් වසා තැබීම සහ ලෝක වෙළඳපොළේ තෙල් බැරලයක මිල ඩොලර් 100 සීමාවේ පැවතීම ශ්රී ලංකාවේ ආර්ථික වර්ධනයට සහ විදේශ සංචිතවලට බරපතල තර්ජනයක් එල්ල කරයි. කෙසේ වෙතත්, 2022 වසරේ පැවති අර්බුදකාරී තත්ත්වයට සාපේක්ෂව වත්මන් ආර්ථික පදනම ශක්තිමත් බැවින් මෙවර පීඩනය කළමනාකරණය කර ගැනීමට වැඩි හැකියාවක් පවතින බව ෆිච් වාර්තාව පෙන්වා දෙයි.
අන්තර්ජාතික මූල්ය අරමුදලේ වැඩසටහන නිසි පරිදි ක්රියාත්මක වන අතර, මැයි මස අවසන් වන විට ඇමරිකානු ඩොලර් මිලියන 700 ක පමණ මූල්ය පහසුකම් ලැබීමට නියමිතය. මීට අමතරව ආසියානු සංවර්ධන බැංකුව සහ ලෝක බැංකුව හරහා ද මූල්ය ආධාර ලැබෙනු ඇතැයි අපේක්ෂා කෙරේ. ෆිච් පුරෝකථනය කරන්නේ 2025 දී ඩොලර් බිලියන 6.8 ක්ව පැවති විදේශ සංචිත ප්රමාණය 2026 දී ඩොලර් බිලියන 7.3 දක්වා ඉහළ යනු ඇති බවයි.
2025 වසරේදී විදේශ ප්රේෂණවල 23% ක වර්ධනයක් දක්නට ලැබුණු අතර, 2026 දී ද එය ස්ථාවර මට්ටමක පවතිනු ඇතැයි අපේක්ෂා කෙරේ. 'ඩිට්වා' සුළි කුණාටුවෙන් පසුව සිදු කෙරෙන ප්රතිසංස්කරණ කටයුතු සඳහා අවශ්ය ද්රව්ය ආනයනය කිරීම සහ ඉහළ බලශක්ති පිරිවැය හේතුවෙන්, 2026 වසරේදී ජංගම ගිණුමේ අතිරික්තය හිඟයක් දක්වා වෙනස් විය හැකිය.
රජයේ ආදායම් එකතු කිරීමේ වර්ධනය හේතුවෙන් 2025 වසරේදී මූල්ය හිඟය 2.3% දක්වා අඩු වූ අතර, 2026 වසරේදී වියදම් ඉහළ යාම හේතුවෙන් එය 4% දක්වා වර්ධනය විය හැකි බව ෆිච් ආයතනය වැඩිදුරටත් සඳහන් කරයි.
2026 දී ඩොලර් බිලියන 7.3 ට විදේශ සංචිත ඉහළ ගිහින් මොන ලබ්බක් කරන්නද?.2026 ට 9.3 ඕන.විසි හත අග 28 මුල වෙනකොට ඩොලර් බිලියන 12 ක් ඕන.නැත්තං විසි අටේ ණය ගෙවන්න පටන් ගන්නකොටම රට බංකොලොත්.මුං රට භාරගෙන අවුරුදු එකහමාරකට වැඩියි.ඒත් ඩොලර් බිලියනයක් එකතු කරගන්න බෑ.හැබැයි මිලියන ගානක් එකතු කරලා බිලියන ගානක් එකතු කරපු ටෝක් දෙන්නේ.
ReplyDelete