දැනට පවතින යුද ගැටුම් අවසන් කිරීම සඳහා වූ කොන්දේසි ඇතුළත් කරුණු 10කින් යුත් ප්රතිචාර පත්රිකාවක් ඉරානය විසින් ඇමරිකා එක්සත් ජනපදය වෙත යොමු කර ඇති බව වාර්තා වේ.
ඉරාන රජයේ නිල පුවත් ඒජන්සිය වන IRNA පුවත් සේවය සඳහන් කළේ ඉරානය මෙමගින් තාවකාලික සටන් විරාමයකට එළඹීමේ යෝජනාව සෘජුවම ප්රතික්ෂේප කර ඇති බවයි.
සති දෙකක ඉහළ පෙළේ සමාලෝචනවලින් අනතුරුව අවසන් කරන ලද මෙම යෝජනාවලිය පකිස්ථානය හරහා ඇමරිකාව වෙත ලබා දී තිබේ.
ඉරානයේ ප්රධාන ඉල්ලීම් අතරට පහත කරුණු ඇතුළත් බව IRNA පුවත් සේවය වැඩිදුරටත් අනාවරණය කරයි.
ඉරානයට පනවා ඇති සම්බාධක ඉවත් කිරීම.
හෝමුස් සමුද්ර සන්ධිය (Strait of Hormuz) හරහා ආරක්ෂිත නාවික ගමනාගමනය සහතික කිරීම.
යුද්ධයෙන් විනාශ වූ ප්රදේශ යළි ගොඩනැගීමේ කටයුතු කඩිනම් කිරීම.
ඉරාකය සහ ලෙබනනය ඇතුළු සමස්ත මැදපෙරදිග කලාපයේ පවතින ගැටුම් අවසන් කිරීම.
කෙසේ වෙතත්, ඉරානයේ මෙම ප්රතිචාරය "දැඩි මතධාරී සහ අපැහැදිලි" එකක් බව ඇමරිකානු බලධාරීන් ප්රකාශ කර ඇතැයි 'ඇක්සියෝස්' (Axios) පුවත් සේවය වාර්තා කළේය. මේ හේතුවෙන් රාජ්යතාන්ත්රික මට්ටමින් විසඳුමක් ලබා ගැනීමේ හැකියාව පිළිබඳව අවිශ්වාසයක් මතුව තිබේ.
මේ අතර, ඉරාන විදේශ අමාත්යාංශයේ ප්රකාශක එස්මයිල් බාකේ පවසා සිටියේ ඉරානයේ ස්ථාවරය ජාතික අවශ්යතා සහ ඔවුන්ගේ "රතු ඉරි" මත පදනම් වූවක් බවයි. ඇමරිකාව රාජ්යතාන්ත්රික විසඳුම් මඟහැරීමට උත්සාහ කරන බවට ද ඔහු චෝදනා කළේය.
මේ අතර, ඇමරිකානු ජනාධිපති ඩොනල්ඩ් ට්රම්ප් විසින් ඉරානයට ලබා දී තිබූ කාලසීමාව තවත් පැය 20කින් දීර්ඝ කර ඇත. ඒ අනුව අඟහරුවාදා රාත්රී 8:00 (ET) වන විට සටන් විරාමයකට එකඟ විය යුතු බවත්, එසේ නොමැති වුවහොත් හෝමුස් සමුද්ර සන්ධිය විවෘත නොකළහොත් ඉරානයේ වැදගත් සිවිල් යටිතල පහසුකම් ඉලක්ක කර ප්රහාර එල්ල කරන බවටත් ඔහු අනතුරු ඇඟවීය.
මීට ප්රතිචාර දක්වමින් ඉරානය පවසා ඇත්තේ ඇමරිකාව ප්රහාර එල්ල කළහොත් ඉරානය විසින් ඊශ්රායලයට සහ ගල්ෆ් කලාපයේ ඇති ඇමරිකානු හිතවාදී යටිතල පහසුකම් වෙත ප්රහාර එල්ල කරන බවයි.
මෙම තත්ත්වය හමුවේ මැදපෙරදිග කලාපයේ යුදමය උණුසුම තවදුරටත් උත්සන්න වී තිබේ.
