බදු ගෙවන්න බැරිව වාහන රැසක් වරායේ හිරවේ..

 මෙරටට ගෙන්වන ලද මෝටර් රථ 500කට ආසන්න ප්‍රමාණයක් විවිධ තාක්ෂණික හා නීතිමය බාධාවන් හේතුවෙන් නිදහස් කර ගැනීමට නොහැකි වී මාස හයකට වැඩි කාලයක් වරාය පරිශ්‍රයේ රඳවා තබා ඇත තිබේ.

මෙසේ සිරවී ඇති රථවාහන අතරින් සියයක් පමණ වසරකටත් වඩා වැඩි කාලයක් වරාය තුළ පවතී.

ඉන් සැලකිය යුතු ප්‍රමාණයක් රජයට පවරා ගැනීමෙන් පසු වෙන්දේසි කිරීමට නියමිත ඒවා බව රේගුව සඳහන් කළේය.

රථවාහන 300ක් පමණ පුද්ගලිකව ආනයනය කළ ඒවා වන අතර, බදු ගාස්තු ඉහළ යාම නිසා අදාළ හිමිකරුවන් ඒවා නිදහස් කර ගැනීමට අපොහොසත් වී ඇත. මීට අමතරව නීති විරෝධී ලෙස මෙරටට ගෙන්වන ලද වාහන ද මේ අතර වේ.

හම්බන්තොට වරායේ ද නිදහස් කර නොගත් වාහන සියයකට ආසන්න ප්‍රමාණයක් පවතී. මැද පෙරදිග කලාපයේ පවතින යුදමය වාතාවරණය නිසා අදාළ ගමනාන්ත වෙත යාමට නොහැකි වූ වාහන තොගයක්, නැවත රැගෙන යාමේ කොන්දේසිය මත තාවකාලිකව එහි ගොඩබසා තිබේ.

මෙලෙස වාහන විශාල වශයෙන් ගොඩගැසී තිබීම වරාය පරිපාලන කටයුතුවලට දැඩි බාධාවක් වී ඇති බව වරාය අධිකාරියේ උසස් නිලධාරියෙක් ප්‍රකාශ කළේය.