භාණ්ඩාගාර වංචාව හිතුවට වඩා දරුණු හොරකමක්.. අවස්ථා දහයකදී හැකර ගිණුමට සල්ලි දාලා..

 රජයේ භාණ්ඩාගාරයට අයත් ඩොලර් මිලියන 2.5ක මුදලක් අස්ථානගත වීම සම්බන්ධයෙන් සිදුකළ මූලික විමර්ශනවලදී අතිශය බරපතළ තොරතුරු රැසක් අනාවරණය වී ඇතැයි රාජ්‍ය මුදල් කාරක සභාවේ සභාපති, පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පවසයි.

මුදල් අමාත්‍යාංශයේ ලේකම්වරයා ඇතුළු ජ්‍යෙෂ්ඨ නිලධාරීන් සහ මහ බැංකුවේ ජ්‍යෙෂ්ඨ නිලධාරීන් කැඳවා පැය තුනකට අධික කාලයක් සිදුකළ දීර්ඝ ප්‍රශ්න කිරීම් හමුවේ මෙම තොරතුරු අනාවරණය වී තිබේ.

එහිදී හෙළි වී ඇති වැදගත්ම කරුණක් වන්නේ පසුගිය නොවැම්බර් මාසය සහ ජනවාරි මාසය අතර කාලය තුළ කිසිදු සොයා බැලීමකින් හෝ විමර්ශනයකින් තොරව අවස්ථා 10කදී මෙම මුදල් ප්‍රශ්නගත ගිණුමට බැර කර ඇති බවයි.

මෙම ගෙවීම් දහයෙන් එකක්වත් අදාළ පාර්ශවයට ලැබී නොමැති බවත්, ඒ සියල්ල වංචාවකට ලක්ව ඇති බවත් රජය සෘජුවම දැනගෙන ඇත්තේ මාර්තු මාසයේදීය.

මෙම ගෙවීම් සම්බන්ධයෙන් මුලින්ම "රතු කොඩි" එසවී ඇත්තේ ජනවාරි මාසයේදී වුවද, ඉන් පසුවද ක්‍රියාමාර්ග ගැනීමේ ප්‍රමුඛතාවය පිළිබඳ ගැටලු මතු වී තිබේ.

විශේෂයෙන්ම ඕස්ට්‍රේලියාවෙන් දැනුම් දෙන තෙක් මෙම ගෙවීම් අදාළ පාර්ශවයට ලැබී නැති බව මෙරට බලධාරීන් දැන නොසිටීම බරපතළ ගැටලුවක් බව සභාපතිවරයා පෙන්වා දුන්නේය.

රජයේ ණය කළමනාකරණ කටයුතු මහ බැංකුවේ සිට භාණ්ඩාගාරයේ අලුත් ආයතනයක් වෙත පැවරීමේ සංක්‍රාන්ති සමයේ පවතින පද්ධතිමය හිඩැස් උපයෝගී කර ගනිමින් වංචාකරුවන් මෙම මුදල් සොරාගෙන ඇති බවට හඳුනාගෙන ඇත.

මේ සම්බන්ධයෙන් අපරාධ පරීක්ෂණ දෙපාර්තමේන්තුව (CID) හරහා විමර්ශන සිදුවන අතර, රාජ්‍ය මුදල් කාරක සභාව ලෙස තමන් අවධානය යොමු කරන්නේ මෙවැනි වංචාවක් සිදුවීමට ඉඩ සැලසූ නීතිමය සහ ක්‍රියාපටිපාටියෙහි පවතින දුර්වලතා පිළිබඳව බව මන්ත්‍රීවරයා සඳහන් කළේය.

මෙම අස්ථානගත වූ ඩොලර් මිලියන 2.5ක මුදල නැවත ලබා ගැනීමට නොහැකි වුවහොත්, අවසානයේ එම බර දැරීමට සිදුවන්නේ මෙරට බදු ගෙවන ජනතාවට බව හර්ෂ ද සිල්වා මහතා අවධාරණය කළේය.

මේ පිළිබඳව සියලු සාක්ෂි සහිත සම්පූර්ණ වාර්තාවක් මාසයක් ඇතුළත කාරක සභාවට ඉදිරිපත් කරන ලෙස නිලධාරීන්ට නියෝග කර තිබේ.