තවත් ආණ්ඩුකාරවරුන් අස්වෙයි..?

 බස්නාහිර පළාත් ආණ්ඩුකාරවරයා සිය ධුරයෙන් ඉල්ලා අස්වීමේ ලිපිය ඉදිරිපත් කිරීමත් සමඟ, තවත් ආණ්ඩුකාරවරුන් කිහිපදෙනෙකු ඉදිරියේදී සිය ධුරවලින් ඉල්ලා අස්වීමට නියමිතව ඇතැයි ලන්ඩනයේ වෙසෙන උවිඳු කුරුකුලසූරිය මහතා සඳහන් කරයි.

බස්නාහිර පළාත් ආණ්ඩුකාරවරයාගේ ඉල්ලා අස්වීමෙන් පසු සිය සමාජ ජාල ගිණුමේ සටහනක් තබමින් ඔහු මේ බව පෙන්වා දී තිබේ.

නව රජය විසින් ආණ්ඩුකාර ධුර සඳහා දේශපාලන පක්ෂවලට සම්බන්ධ නොවන ස්වාධීන පිරිස් පත් කරනු ලැබුවේ, තමන් පාක්ෂිකයන්ට තනතුරු ලබා නොදෙන බව ප්‍රසිද්ධියේ පෙන්වීමට වුවද, එහි සැබෑ අභ්‍යන්තර තත්ත්වය වෙනස් එකක් බව කුරුකුලසූරිය මහතා පවසයි.

ඔහු පෙන්වා දෙන්නේ වත්මන් ආණ්ඩුකාරවරුන් ස්වාධීන පුද්ගලයන් වුවද, ඔවුන් යටතේ සේවය කරන ලේකම්වරුන් ජනතා විමුක්ති පෙරමුණේ (ජවිපෙ) ක්‍රියාකාරීන්ගෙන් පත් කර ඇති බවයි.

 මෙම ලේකම්වරුන් හරහා ආණ්ඩුකාරවරුන්ව පාලනය කිරීමට හා හැසිරවීමට උත්සාහ කිරීම හේතුවෙන් ආණ්ඩුකාරවරුන් දැඩි කලකිරීමට පත්ව සිටින බවත්, ඉදිරි ආණ්ඩුකාර ඉල්ලා අස්වීමට ප්‍රධානතම හේතුව එය බවත් විඳු කුරුකුලසූරිය මහතා වැඩිදුරටත් සඳහන් කර තිබේ.